नाराज रुपाली ठोंबरेंची अजित पवार गटाकडून मनधरणी; राजीनाम्याच्या चर्चेनंतर महत्वाची जबाबदारी

पुणे : अजित पवारांच्या राष्ट्रवादी काँग्रेसच्या पुणे शहराची कार्यकारिणी जाहीर करण्यात आली आहे. या नव्या कार्यकारिणीत नाराज रुपाली ठोंबरे पाटील यांना स्थान देण्यात आलं आहे. त्यांना एका मतदारसंघाचं कार्याध्यक्षपद देण्यात आलंय. राजीनाम्याच्या चर्चेनंतर ठोंबरेंना महत्वाची जबाबदारी देऊन पक्षाने नाराजी दूर करण्याचा प्रयत्न केल्याचं दिसत आहे.

रुपाली ठोंबरे आणि रुपाली चाकणकर यांच्यातील वादामुळे अजित पवार गटातील अंतर्गत वाद चव्हाट्यावर आला होता. दोघांमधील वाद पक्षश्रेष्ठीपर्यंत पोहोचला होता. या वादानंतर रुपाली पाटील ठोंबरे यांची पक्षाच्या प्रवक्तेपदावरून गच्छंती झाल्याचं बोललं गेलं. त्यामुळे रुपाली पाटील यांनी नाराजीही व्यक्त केली होती. काही दिवसांपूर्वी ठोंबरे यांनी शिंदे गटाचे खासदार श्रीकांत शिंदे यांची भेट घेतली होती. या भेटीनंतर ठोंबरे यांच्या राजीनाम्याची जोरदार चर्चा सुरु होती.

राजीनाम्याच्या चर्चेदरम्यान अजित पवार गटाचे आमदार सुनील टिंगरे यांच्याकडून रुपाली ठोंबरे पाटील यांना महत्वाची जबाबदारी देण्यात आली आहे. अजित पवार गटाने सर्व विधानसभेत अध्यक्ष, उपाध्यक्ष आणि समन्वयक नेमले आहेत. त्यातील कसबा विधानसभा मतदारसंघाच्या कार्यध्यक्ष पदावर रुपाली पाटील यांची नेमणूक करण्यात आली आहे. पक्षाने नवी जबाबदारी दिल्याने त्यांची नाराजी दूर होतेय का, हे पाहावे लागणार आहे.

आमदार टिंगरे यांनी पत्रात काय म्हटलं?

सुनील टिंगरे यांनी पत्रात म्हटलं आहे की, 'अजित पवार यांनी मला पुणे शहर अध्यक्ष (पूर्व) या पदावर नियुक्ती दिली. तसेच माझ्याकडे वडगावशेरी, हडपसर, शिवाजीनगर व कसबा विधानसभा मतदारसंघाचे कार्यक्षेत्र दिलंय'

'पक्षाध्यक्ष्यांच्या आदेशानुसार माझ्या कार्यक्षेत्रातील पुणे शहर कार्यकारीणी तयार केलेली आहे. त्यामध्ये राष्ट्रवादी काँग्रेस पार्टीच्या शिव, शाहू, फुले आंबेडकरांच्या विचारांच्या व पुरोगामी विचारांच्या सक्रीय कार्यकर्त्यांचा समावेश केलाय. या कार्यकारीणीचा तपशील देत आहे, असेही त्यांनी म्हटलं आहे.