Navi Mumbai : नवी मुंबईच्या लॉजमध्ये नको ते उद्योग, पोलिसांनी उद्ध्वस्त केले देहविक्रीचं रॅकेट; ७ महिलांची सुटका

नवी मुंबईतून मोठी बातमी समोर आली आहे. तुर्भे नाका परिसरात एका लॉजमध्ये बेकायदेशीर देहविक्री व्यवसायावर कारवाई करण्यात आली आहे. या कारवाईत पोलिसांनी ७ महिलांची सुखरूप सुटका केली आहे. पोलिसांनी तरुणींचा सौदा करणाऱ्या ३ आरोपींना अटक केली आहे. मात्र लॉजचा मुख्य मालक फरार आहे. त्याच्या शोधासाठी विशेष पथक तयार करण्यात आले आहे. पोलीस या घटनेचा सविस्तर तपास करत आहेत.

मिळलेल्या माहितीनुसार, अनैतिक मानव तस्करी विरोधी विभागाचे वरिष्ठ पोलीस निरीक्षक पृथ्वीराज घोरपडे यांना तुर्भे नाका भागातील एका लॉजमध्ये ग्राहकांकडून पैसे घेऊन महिलांचा आणि तरुणींचा सौदा केला जात आहे. अशा स्वरूपाची गोपनीय माहिती मिळाली होती. माहिती खरी आहे की खोटी याची शहानिशा करण्यासाठी पोलिसांनी युक्ती लढवली.

तयार केलेल्या प्लॅननुसार एका बनावट ग्राहकाला लॉजमध्ये पाठवण्यात आले. सदर बनावट ग्राहकाने महिलांपैकी एका महिलेला पसंती दर्शवली असता, त्याच्याकडून मोबदल्यापोटी ३५०० रुपये स्वीकारण्यात आले. या व्यवहारामुळे देहव्यापार सुरू असल्याची खरी माहिती मिळाल्यानंतर पोलिसांनी घटनास्थळी तात्काळ छापा टाकला.

पोलिसांनी केलेल्या या कारवाईत या 'राज' लॉजमध्ये ७ महिलांना देहव्यापारासाठी ठेवण्यात आल्याचे आढळून आले. पोलिसांनी घटनास्थळी लॉज व्यवस्थापक अजय कैलास गोस्वामी, महिला पुरवठादार किशोर पूर्णचंद्र साहू आणि वेटर अजय कुमार यांना ताब्यात घेत अटक केली. प्राथमिक तपासात हे आरोपी एकमताने महिलांना / तरुणींना लॉजमध्ये आणून ठेवत, ग्राहकांच्या पसंतीनुसार व्यवहार ठरवत आणि मिळालेली रक्कम आपसात वाटून घेत असल्याचे उघड झाले आहे.

पोलिसांनी बनावट ग्राहकाकडून देण्यात आलेली रक्कम जप्त केली आहे. ती या प्रकरणातील महत्त्वाचा पुरावा मानली जात आहे. अटक करण्यात आलेल्या आरोपींविरोधात अनैतिक मानवी तस्करी प्रतिबंधक कायद्यांतर्गत गुन्हा दाखल करण्यात आला आहे. न्यायालयाने आरोपींना दोन दिवसांची पोलीस कोठडी सुनावली आहे.

या रॅकेटप्रकरणी सखोल चौकशी सुरू आहे.दरम्यान, लॉजचा संचालक करणाकर शेट्टी फरार असून त्याचा शोध घेण्यासाठी पोलिसांनी विविध पथके तैनात केली आहेत. नवी मुंबई परिसरात सुरू असलेल्या अशा अवैध व्यवसायांवर कठोर कारवाईचा इशाराही पोलिसांनी दिला आहे.