Nagar : नगर जिल्ह्याबाहेर चारा वाहतुकीला बंदी : जिल्हाधिकाऱ्यांचा आदेश

- सुशील थोरात

Ahmednagar News :

नगर जिल्ह्यात उत्पादित होणारा चारा इतर जिल्ह्यात वाहतुक करण्यास मनाई करण्यात आली आहे. मुरघास, आणि टोटल मिक्स रेशन (टीएमआर) वाहतुकीवर जिल्हा प्रशासनाने बंदी घातली आहे. संभाव्य चारा टंचाईच्या पार्श्वभूमीवर जिल्हाधिकारी सिद्धाराम सालीमठ यांनी याबाबतचे आदेश काढलेत. (Maharashtra News)

नगर जिल्ह्यात सरासरीपेक्षा कमी पर्जन्यमान झाल्याने जनावरांसाठी चाऱ्याची टंचाई परिस्थिती निर्माण होण्याची शक्यता आहे. फौजदारी प्रक्रिया संहिता 1973 चे कलम 144 नुसार प्राप्त अधिकाराचा वापर करत जिल्हाधिकाऱ्यांनी आदेश काढले आहेत. हा आदेश पुढील दोन महिन्यांसाठी लागू राहणार आहे.

जिल्हाधिकारी सिद्धाराम सालीमठ यांच्या आदेशामुळे नगर जिल्ह्यातून अन्य जिल्ह्यात चारा नेता येणार नाही अथवा त्याची विक्री करता येणार नसल्याचे स्पष्ट झाले आहे. राज्यातील बहुतांश जिल्ह्यात यंदा पाऊस कमी झाल्याने शेतक-यांना चारा टंचाईस समाेरे जावे लागते की काय असा चित्र आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

Edited By : Siddharth Latkar