Mahayuti Clash: ठाणे-केडीएमसीत महायुती धुसफूस? भाजप-शिंदेंची युती तुटणार?

राज्यात आधीच एकमेंकांच्या पक्षाचे कार्यकर्ते आणि पदाधिकारी फोडण्यावरून भाजप आणि शिंदेसेनेत तणाव निर्माण झालाय. नगरपरिषदांसाठी काही ठिकाणी महायुतीतील मित्रपक्षांनी विरोधकांशी हातमिळवणी केलीय. अशातच कल्याण-डोंबिवली महानगरपालिकेत भाजप-शिंदेसेनेची युती तुटण्याचीच शक्यता आहे. त्याचं कारम ठरलंय भाजपचे प्रदेशाध्यक्ष रवींद्र चव्हाण यांनी मतदारांना केलेलं आवाहन.

चव्हाण यांच्या या आवाहनामुळे युतीतील ही धुसफूस चव्हाट्यावर आलीय. मात्र ही धुसफूस एकनाथ शिंदे बंड करून महायुतीत सामील झाल्यापासूनची आहे. कल्याण-डोंबिवली आणि ठाण्यात भाजप विरुद्ध शिंदेसेना असा संघर्ष अनेकदा पाहायाला मिळालाय. त्यातच ठाणे आणि कल्याण- डोंबिवली महापालिकेसाठी भाजपनं स्वबळाचा नारा दिल्यानं शिंदेसेनेतही अस्वस्थता आहे.

गेल्या काही वर्षांपासून भाजपनं ठाणे आणि कल्याण- डोंबिवलीमध्ये इतर पक्षातील नेत्यांची इनकमिंग करून आपली संघटनात्मक ताकद वाढवण्याचा चांगलाच प्रयत्न केलाय. त्यामुळे या दोन्ही महापालिकेत भाजप आणि शिंदेसेनेची ताकद नेमकी कशी आहे पाहूयात. 2015 साली झालेल्या महापालिका निवडणुकीप्रमाणे कल्याण- डोंबिवलीत एकत्रित शिवसेनेचे 53,भाजपचे 43 नगरसेवक निवडून आले होते. तर ठाणे महापालिकेत 2017 ला तत्कालीन शिवसेनेच 57 आणि भाजपचे 8 नगरसेवक निवडून आले होते.

मात्र आगामी महापालिका निवडणुकीत ठाकरे बंधू एकत्र आल्यास भाजप आणि शिंदेसेनेपुढे मोठं आव्हान निर्माण होणार आहे. ठाणे, कल्याण- डोंबिवलीत भाजप आणि शिंदेसेनेतील हा अंतर्गत वाद आता महापालिका निवडणुकांपर्यंत थंडावतो की अधिक चिघळतो, हे पाहणं महत्त्वाचं आहे.