मुंबई सी-लिंकवर अवजड ट्रकचा धुमाकूळ; नियम धाब्यावर, भरधाव वेगाने लेन बदलत प्रवास

सुरज मसुरकर, साम टीव्ही

मुंबईच्या प्रतिष्ठेचा मानला जाणारा वांद्रे-वरळी सी-लिंक पुन्हा एकदा चर्चेत आला आहे. सी-लिंकवर अवजड वाहनांना प्रवेशबंदी असतानाही एका अवजड ट्रकने भरधाव वेगाने पुलावरून प्रवास केल्याचा व्हिडीओ समोर आला आहे. एका जागरूक नागरिकाने आपल्या कारच्या डॅशकॅमेरामध्ये हा प्रकार कैद केला आहे. व्हिडीओमध्ये MH 48 BQ 1127 क्रमांकाचा लाल रंगाचा ट्रक दिसत आहे. ट्रकमध्ये साहित्य भरलेले असून ते हिरव्या ताडपत्रीने झाकण्यात आले आहे. हा ट्रक सी-लिंकवरून वेगाने जाताना दिसत असून, यादरम्यान तो लेन बदलत तसेच इतर वाहनांना ओव्हरटेक करत असल्याचं व्हिडीओत दिसत आहे.

सी-लिंकवरील वाहतुकीच्या नियमांनुसार दुचाकी, ऑटो रिक्षा, अवजड मालवाहू ट्रक आणि ट्रॅक्टरला प्रवेशाची परवानगी नाही. या पुलावर प्रामुख्याने हलक्या चारचाकी वाहनांना प्रवेश दिला जातो. मात्र, नियमांची पर्वा न करता हा अवजड ट्रक सी-लिंकवर आल्याने सुरक्षेचा प्रश्न निर्माण झाला आहे. त्यातच ट्रक भरधाव वेगाने लेन बदलत आणि इतर वाहनांना ओव्हरटेक करताना दिसत असल्याने अपघाताचा धोका निर्माण होऊ शकतो.

व्हिडीओमध्ये ट्रक विरुद्ध दिशेच्या लेनमधून येताना दिसत असल्याचा दावा करण्यात आला आहे. त्यामुळे या प्रकाराची संबंधित यंत्रणांकडून दखल घेतली जाणार का आणि नियमांचे उल्लंघन करणाऱ्या वाहनावर कारवाई होणार का, असा सवाल उपस्थित होत आहे.