Mumbai Rain Alert : मुंबईला पावसाचा तडाखा, पश्चिम रेल्वेची वाहतूक विस्कळीत; प्रवाशांचा खोळंबा

सचिन गाड, साम टीव्ही मुंबई

मुंबईत पावसाचा जोर वाढलाय. मुंबईत ठिकठिकाणी मुसळधार पाऊस, तर अनेक ठिकाणी रिमझिम पावसाची नोंद झाल्याचं समोर आलंय. मुंबई उपनगरात सकाळी पाच वाजेपर्यंत १३१.२ मिलिमीटर पावसाची नोंद, तर मुंबई शहरात ७७.४ मिलिमीटर पावसाची नोंद झालीय. मुंबईतही आजही राहणार पावसाचा जोर कायम राहणार आहे. पश्चिम रेल्वेची वाहतूक विस्कळीत झालीय.

रेल्वेची वाहतूक विस्कळीत

प्रभादेवी आणि दादर दरम्यान झाड कोसळल्याने पश्चिम रेल्वेची सेवा विस्कळीत झाली होती. बोरिवलीच्या दिशेने जाणाऱ्या धिम्या मार्गावर पिंपळाचं झाड कोसळलं होतं. ही घटना सकाळी साडेसात वाजेच्या सुमारास घडली होती. ऐन रेल्वे रुळावर झाड कोसळल्याने धिम्या मार्गावरील लोकलला जवळपास तासभर खोळंबा झाला होता. जवळपास तासाभराच्या रखडपट्टीनंतर बोरिवलीच्या दिशेने धिम्या मार्गावरील गाड्या सुरू झाल्यात.

अतिमुसळधार पावसाची शक्यता

मुंबईतही आजही पावसाचा जोर कायम राहणार आहे. काही ठिकाणी अतिमुसळधार पावसाची शक्यता हवामान विभागाने वर्तवली आहे. आज मुंबईत येलो अलर्ट देण्यात आलाय. पुढील ४८ तास मुंबईत चांगला पाऊस (Mumbai Rain) अपेक्षित आहे. कोकणात आज काही भागात अतिवृष्टीचा इशारा देण्यात आलाय. रत्नागिरी आणि सिंधुदुर्गासाठी रेड अलर्ट जारी करण्यात आलाय.रायगडमध्ये अतिमुसळधार ते मुसळधार पावसाचा अंदाज दिलाय.

दादर प्रभादेवीदरम्यान रेल्वे रूळावर झाड कोसळल्याची घटना (Mumbai Rain Latest Update) घडली. त्यामुळे विरारकडे जाणाऱ्या लोकल थांबल्या होत्या. सकाळी साडेपाचवाजेपर्यंत दहिसरमध्ये १७१ मिमी, मुंबई एयरपोर्टमध्ये ११२ मिमी, राम मंदिरपरिसरात १५१ मिमी,टाटा पॉवर (चेंबूर)मध्ये ५१ मिमी, विक्रोलीत १३१.५ मिमी, भायखला ६५.५ मिमी, महालक्ष्मी २७.५ मिमी, माटुंगा ७१.५ मिमी, सायनमध्ये ८१. २ मिमी पावसाची नोंद झालीय.

ठाण्यात आज ऑरेंज अलर्ट

काही ठिकाणी १०० मिमीहून अधिक पावसाची शक्यता आहे. त्यासाठी ऑरेंज अलर्ट जारी करण्यात आला आहे. ठाण्यात आज ऑरेंज अलर्ट, काही भागात अतिमुसळधार ते मुसळधार पावसाचा अंदाज (Local Train Update) आहे. मागील २४ तासात ठाणे शहरात १२० मिमीहून अधिक पावसाची शक्यता आहे. पालघरमध्ये आज यलो अलर्ट जारी करण्यात आलाय. काही ठिकाणी अतिमुसळधार पावसाचा इशारा दिला (Rain Update) गेलाय.