Mumbai Water Cut: मुंबईकरांनो पाणी जपून वापरा! आज आणि उद्या ५ ते १० टक्के पाणीकपात, नेमकं कारण काय?

मुंबईकरांसाठी महत्वाची बातमी आहे. मुंबईकरांनी आज आणि उद्या पाण्याचा जपून वापर करावा कारण मुंबईमध्ये पालिकेकडून ५ ते १० टक्के पाणीकपात करण्यात येणार आहे. त्यामुळे दोन दिवस मुंबईकरांना पाणीकपातीचा सामना करावा लागणार आहे. मुंबईला पाणी पुरवठा करणाऱ्या धरणक्षेत्रात यंदा चांगला पाऊस झाला असून धरणं देखील १०० टक्के भरली होती. पण असे असताना देखील मुंबईत पाणीकपात करण्यात आली आहे. यामागचे नेमकं कारण काय हे आपण जाणून घेणार आहोत...

मिळालेल्या माहितीनुसार, वैतरणा जलवाहिनीच्या ९०० मिलीमीटर झडपेमध्ये बिघाड झाल्याने मुंबईमध्ये पाणीकपात करण्यात आली आहे. १७ ते १८ ऑक्टोबर या दोन दिवसांच्या कालावधीत संपूर्ण मुंबईत ५ ते १० टक्के पाणीकपात करण्यात आली आहे. त्यामुळे दोन दिवस मुंबईकरांनी पाण्याचा जपून वापर करावा असे आवाहन मुंबई महानगर पालिकेकडून करण्यात आले आहेत.

वैतरणा जलवाहिनीवरील यंत्रणेमध्ये ताराळी येथे ९०० मिलीमीटर झडपेमध्ये बिघाड झाला आहे. त्याच कारणास्तव जलवाहिनी यंत्रणा अंशतः बंद करण्यात आली आहे. यामुळे मुंबईला पाणीपुरवठा करणाऱ्या भांडूप येथील जलशुद्धीकरण प्रकल्पात होणाऱ्या पाणीपुरवठ्यामध्ये ५ ते १० टक्के घट झाली आहे. याचाच परिणाम म्हणून संपूर्ण मुंबईमध्ये आज आणि उद्या ५ ते १० टक्के पाणीकपात करण्याचा निर्णय पालिकेकडून घेण्यात आला.

मुंबई शहर आणि उपनगराला वैतरणा धरणातून पाणीपुरवठा करण्‍यात येतो. या धरणामधून पाणी वाहून नेणाऱ्या वैतरणा जलवाहिनीवरील यंत्रणेमध्ये बिघाड झाला असून हे दुरुस्‍ती काम करण्यात येणार आहे. दुरूस्तीचे काम ४८ तास चालणार आहे. त्यामुळेच धरणामधून पाणी वाहून नेणारी यंत्रणा अंशतः बंद करण्यात आली आहे. त्यामुळे मुंबईमध्ये पाणीकपात करण्यात आली आहे.