Bellasis Bridge Video: १३१ वर्षे जुना बेलासिस पूल आजपासून १८ महिने वाहतुकीसाठी बंद; नेमकं कारण काय?

रुपाली बडवे, मुंबई

मुंबईतील ब्रिटिशकालीन बेलासिस पूल (Bellasis Bridge) आजपासून वाहतुकीसाठी बंद करण्यात आला आहे. १८ महिने हा पूल वाहतुकीसाठी बंद राहणार आहे. मुंबई सेंट्रल (Mumbai Central) आणि ग्रँड रोडदरम्यान (Grand Road) असणारा हा ब्रिटीशकालीन पूल पुनर्बांधणीच्या कामासाठी पाडण्यात येणार आहे. त्यासाठी हा पूल आजपासून वाहतुकीसाठी बंद करण्यात आला आहे. या पुलाच्या पुनर्बांधणीचे काम १८ महिने चालणार आहे. रेल्वे (Railway) आणि मुंबई महानगर पालिकेने (BMC) हा पूल पाडून त्याजागी नवीन पूल बांधण्याचा निर्णय घेतला आहे.

मिळालेल्या माहितीनुसार, आजपासून बेलासिस उड्डाणपुलावरील वाहतूक बंद करण्यात आली आहे. १३१ वर्ष जुन्या या उड्डाणपुलाची पुर्नबांधणी रेल्वे आणि मुंबई महापालिकेकडून करण्यात येणार आहे. पुर्नबांधणीमुळे जवळपास १८ महिने हा उड्डाणपूल वाहतुकीसाठी बंद राहणार आहे. गोखले पूल कोसळल्यानंतर झालेल्या सर्वेक्षणात बेलासिस उड्डाणपूल धोकादायक असल्याचे निदर्शनास आले होते. त्यामुळे हा उड्डाणपूल पाडून त्याजागी नवीन पूल बांधण्याचा निर्णय घेण्यात आला. उड्डाणपुलाच्या पुर्नबांधणीच्या कामामुळे वाहनचालक आणि पादचार्यांची गैरसोय होणार आहे. त्यामुळे वाहतूक वळविण्याचा निर्णय वाहतूक पोलिसांनी घेतला आहे.

अंधेरी पूर्व आणि पश्चिमेला जोडणारा गोखले पूल जुलै २०१८ मध्ये कोसळला होता. त्यानंतर मुंबईतील जुन्या पुलांचा प्रश्न ऐरणीवर आला होता. गोखले पूल कोसळल्यानंतर आयआयटी मुंबई या संस्थेतील तज्ज्ञांमार्फत मुंबईतील सर्व पुलाची संरचनात्मक तपासणी करण्यात आली होती. या तपासणीत मुंबई सेंट्रल आणि ग्रँड रोडला जोडणारा बेलासिस पूल धोकादायक असल्याचे निर्दशनास आले होते. त्यानंतर बेलासिस पुलाची तातडीने दुरुस्ती किंवा पुनर्बांधणी करण्याची शिफारस करण्यात आली होती. त्यानंतर हा पूल पाडून त्याची पुनर्बांधणी करण्याचा निर्णय घेण्यात आला.

महत्वाचे म्हणजे, बेलासिस पूल पाडल्यानंतर या पुलाच्या रेल्वेच्या हद्दीतील काम पश्चिम रेल्वे करणार आहे. तर पुलाच्या जोडरस्त्याची उभारणी मुंबई महापालिकेकडून करण्यात येणार आहे. बेलासिस पूल आजपासून वाहनांसाठी बंद असणार आहे. पण हा पूल पादचाऱ्यांसाठी सुरू असेल, अशी माहिती पश्चिम रेल्वेच्या अधिकाऱ्यांनी दिली आहे. बेलासिस पूल आजपसून बंद असल्यामुळे आता वाहनचालकांना पर्यायी मार्गाचा वापर करावा लागणार आहे.