याकूब मेनन कबरीच्या सुशोभिकरणावरून नवा वाद; मुंबई महापालिकेने दिले 'हे' स्पष्टीकरण

Yakub Memon Grave Controversy : १९९३ मध्ये झालेल्या मुंबई बाॅम्ब स्फोटात सहभागी असलेल्या याकूब मेननला फाशी झाली. त्यानंतर त्याच्या कुटुंबीयांनी मरीन लाईन्स येथील बडा कब्रिस्तान मध्ये याकूब मेननला दफन केले. त्याच्या थडग्यावर विद्युत रोषणाई व सौंदर्यीकरण केले. मात्र बडा कब्रिस्तान ही खाजगी ट्रस्टची जागा असून पालिकेचा या जागेशी संबंध नाही. मुंबई महापालिका (BMC) फक्त मृत्यू दाखला देण्याचे काम करते, असे पालिकेच्या सी - वॉर्ड कार्यालयाने कबरीच्या सुशोभिकरणावरून झालेल्या वादावर स्पष्टीकरण दिले आहे.

मुंबईत १९९३ मध्ये सिरियल बाॅम्ब स्फोट घडवण्यात आले होते. डी गॅगचा मुख्य दाऊद इब्राहिम याच्या सांगण्यावरुन याकूब मेनन याने बाॅम्ब स्फोट घडवून आणल्याने मेनन याचा सहभाग असल्याचे स्पष्ट झाले होते. त्यानंतर त्याला फाशी देण्यात आली. मेननचा मृतदेह कुटुंबीयांकडे सोपवण्यात आला. कुटुंबीयांनी मरीन लाईन्स येथील खाजगी ट्रस्टच्या मालकीची बडा कब्रिस्तानमध्ये याकूब मेनन याला दफन केले. त्यानंतर याकूब मेनन याच्या थडग्यावर विद्युत रोषणाई व सौंदर्यीकरण करण्यात आल्याचा प्रकार उघडकीस आला. यावरून राजकीय वातावरण पेटले आहे.

दरम्यान, ही जागा खाजगी ट्रस्टची असून पालिकेचा संबंध नाही. मुंबई महानगरपालिका फक्त दफन करण्यासाठीची परवानगी देते. त्यामुळे कुठल्याही प्रकारची परवानगी देण्याचा प्रश्न उपस्थित होत नाही, असे स्पष्टीकरण पालिकेच्या सी - वॉर्डचे सहायक आयुक्त किशोर येरमे यांनी दिले आहे.

कोण आहे याकूब मेमन?

याकूब मेमन हा मुंबईतील ९३ बॉम्बस्फोटांचा दोषी आहे. ज्याला 2015 मध्ये फाशीची शिक्षा सुनावण्यात आली होती. त्यानंतर 30 जुलै 2015 रोजी दक्षिण मुंबईतील बडा स्मशानभूमीत त्याच्यावर अंत्यसंस्कार करण्यात आले. याकूब हा एकमेव दोषी होता ज्याला फाशीची शिक्षा सुनावण्यात आली होती. आता त्याच याकुबच्या कबरीचे समाधीत रूपांतर करण्याचा प्रयत्न सुरू आहे. संगमरवरी दगडापासून बनवलेल्या या कबरीवर एलईडी दिवे लावण्यात आले होते. तसेच इथे २४ तास पहारा असतो.