Mumbai Local Fight : मुंबई लोकलमध्ये सीटवरुन वाद, प्रवाशांमध्ये तुफान हाणामारी; घटनेचा Video व्हायरल

विकास मिरगणे, साम टीव्ही, प्रतिनिधी

Mumbai Train Fight Video : मध्य, पश्चिम किंवा हार्बर.. लोकल ट्रेनच्या तिन्ही मार्गांवर प्रवाशांना नेहमीच गर्दीचा सामना करावा लागतो. ऑफिस, कॉलेजच्या वेळांमध्ये लोकल ट्रेनमध्ये सर्वात जास्त गर्दी असते. अशा वेळी ट्रेनमध्ये नीट उभं राहायला नीट जागाही नसते. अशा वेळी ट्रेनमध्ये जागेवर, उभं राहण्यावरुन वाद, भांडण होत असल्याचे पाहायला मिळते. अशीच एक घटना पुन्हा एकदा घडली आहे.

नवी मुंबईत पुन्हा एकदा लोकल ट्रेनमध्ये प्रवासी सीटसाठी आक्रमक झाल्याचे पाहायला मिळाले. प्रवाशांमध्ये सीटसाठी हाणामारी देखील झाली. ही हाणामारीची घटना हार्बर मार्गावरील पनवेल-सीएसएमटी लोकलमध्ये सानपाडा स्टेशनदरम्यान घडली आहे. या हाणामारीच्या घटनेचा व्हिडीओ सोशल मीडियावर व्हायरल होत आहे.

सानपाडा स्टेशनदरम्यान पनवेल-सीएसएमटी लोकलमध्ये सीटसाठी झालेल्या वादात प्रवाशांमध्ये हाणामारी झाली. हाणामारीदरम्यान शिवीगाळ झाल्याचेही व्हायरल व्हिडीओमध्ये पाहायला मिळाले. सीटवर बसण्यावरुन झालेल्या वादाचे रुपांतर मराठी विरुद्ध अमराठी वादात होण्याची शक्यता होती. पण सहप्रवाशांनी वेळीच हस्तक्षेप केल्याने परिस्थिती नियंत्रणात आली.

ठाणे-वाशी लोकलमध्येही हाणामारी

ठाणे-वाशी दरम्यान टान्स हार्बर मार्गावर एका लोकल ट्रेनमध्ये हाणामारी झाली. दोन प्रवाशांमध्ये ट्रेनमधील सीटवरुन झालेल्या बाचाबाचीमधून फ्री स्टाईल हाणामारी झाली. या दोघांचा वाद लोकल ट्रेनमधील सहप्रवाशांनी मिटवून दिला. या घटनेचा व्हिडीओ सोशल मीडियावर तुफान व्हायरल झाला आहे. या व्हिडीओत प्रवासी हाणामारी करत असल्याचे दिसते.