Ghatkopar Accident : मुंबईत पुन्हा भीषण अपघात; भरधाव टेम्पोने ५ ते ६ जणांना चिरडलं, एकाचा मृत्यू

मयूर राणे, साम टीव्ही

मुंबई : मुंबईतील कुर्ला येथील बेस्ट अपघाताची घटना ताजी असताना आणखी एक भीषण अपघाताची घटना घडली आहे. कुर्ल्यानंतर घाटकोपरमध्येही भीषण अपघाताची घटना घडली आहे. या भीषण अपघातात भरधाव टेम्पोने ५ ते ६ पादचाऱ्यांना चिरडल्याची घटना घडली आहे. या भीषण अपघातात एका महिलेचा मृत्यू झाला आहे.

मुंबईच्या कुर्ल्यामध्ये काही दिवसांपूर्वी बेस्ट बस अपघाताची घटना घडली होती. या अपघातात १० हून अधिक जणांचा मृत्यू झाला. भरधाव बेस्टमुळे काही जणांचा जागीच मृत्यू झाला होता. या अपघातानंतर रस्त्यावरून चालणाऱ्या पादचाऱ्यांच्या सुरक्षेचा प्रश्न ऐरणीवर आला होता. या अपघातानंतर मुंबईत एकच भीती पसरली होती. त्यानंतर मुंबईत आणखी एका अपघाताची घटना घडली आहे. मुंबईच्या घाटकोपरमध्ये भीषण अपघात झाला आहे.

मुंबईच्या घाटकोपरमध्ये भरधाव टेम्पोने पादचाऱ्यांना चिरडल्याची घटना घडली आहे. या भरधाव टेम्पोन पाच ते सहा पादचाऱ्यांना चिरडलं आहे. या अपघातात एका महिलेचा मृत्यू झाला आहे. या अपघातामधील टेम्पो चालक दारूच्या नशेत होता का, याची माहिती अद्याप हाती आलेली नाही. या अपघातानंतर पोलीस कर्मचारी तातडीने घटनास्थळी पोहोचले.

नेमकं काय घडलं?

घाटकोपरच्या चिराग नगरमध्ये टेम्पो चालक २५ वर्षीय उत्तम बबन खरातचं वाहनावरील नियंत्रण सुटलं. त्यानंतर त्याने थेट ५-६ पादचाऱ्यांना चिरडलं. या अपघातात ३५ वर्षीय प्रीती पटेल नावाच्या महिलेचा मृत्यू झाला.

तर २३ वर्षीय रेश्मा शेख, २७ वर्षीय मारुफा शेख, ३८ वर्षीय तोफा उजहर शेख, २८ वर्षीय मोहरम अली अब्दूल रहीम शेख हे जखमी झाले आहेत. या नागरिकांना किरकोळ दुखापती झाल्या आहेत. त्यांना तात्काळ राजवाडी रुग्णालयात उपचारासाठी दाखल करण्यात आलं. या अपघातानंतर पोलिसांनी टेम्पो चालकाला ताब्यात घेतलं आहे. तसेच टेम्पो देखील ताब्यात घेतला आहे.