Mumbai Dagadi Chawl Fire : मुंबईतील दगडी चाळीतील इमारतीला आग, १ तासानंतर...

रुपाली बडवे

Mumbai Dagadi Chawl Fire Breaking News : मुंबईतील भायखळा परिसरातील दगडी चाळीत एका इमारतीला बुधवारी रात्री उशिरा आग लागली. इमारतीच्या दुसऱ्या मजल्यावरील खोलीला ही आग लागल्याचे महापालिकेच्या अधिकाऱ्यांकडून सांगण्यात आले.

मिळालेल्या माहितीनुसार, मुंबईतील (Mumbai) भायखळा परिसरात बी. जे. मार्गावरील दगडी चाळीतील दोन मजली इमारतीच्या दुसऱ्या मजल्यावरील खोलीत आग (Mumbai Fire) लागली.

बुधवारी रात्री साधारण ९ वाजून २० मिनिटांनी ही आग लागली. या घटनेची माहिती मिळताच मुंबई महापालिकेच्या (BMC) अग्निशमन दलाचे जवान बंबांसह घटनास्थळी पोहोचले.

दगडी चाळीतील इमारतीला आग लागल्याच्या घटनेची माहिती महापालिकेच्या अग्निशमन केंद्राला (Mumbai Fire Brigade) कळवण्यात आली. अग्निशमन केंद्राचे जवान, वाहतूक पोलीस, पोलीस (Police) आणि रुग्णवाहिका तात्काळ घटनास्थळी पोहोचले.

एका तासानंतर आग आटोक्यात

जवानांनी आग आटोक्यात आणण्याचे शर्थीचे प्रयत्न केले. तब्बल एका तासानंतर आग आटोक्यात आणण्यात अग्निशमन जवानांना यश आले.

अग्निशमन अधिकाऱ्यांच्या माहितीनुसार, आगीच्या घटनेची माहिती मिळताच चार अग्निशमन बंब घेऊन जवान घटनास्थळी पोहोचले. या घटनेत कोणतीही जीवितहानी किंवा कुणीही जखमी झालेले नाही. आगीवर नियंत्रण मिळवले आहे. आगीचे कारण अद्याप स्पष्ट झालेले नाही.