CSMT Block : महत्त्वाची बातमी! सीएसएमटी स्थानकावर ८५ दिवसांचा ब्लॉक; दादरपर्यंतच धावणार अनेक एक्सप्रेस

रेल्वे प्रवाशांसाठी महत्त्वाची बातमी आहे. छत्रपती शिवाजी महाराज टर्मिनस येथे जवळपास ८५ दिवसांचा ब्लॉक असणार आहे. छत्रपती शिवाजी महाराज टर्मिनस येथे पुनर्विकास कामांसाठी फलाट क्रमांक १६ आणि १७ वर ट्राफिक आणि पॉवर ब्लॉक घेण्यात येणार आहे.

सीएसएमटी स्थानकावर फलाटाच्या पूनर्विकास कामासाठी हा ब्लॉक घेतला जाणार आहे. या कालावधी सर्व मेल आणि एक्सप्रेस गाड्यांचं वेळापत्रक बदलणार आहे. अनेक ट्रेन या सीएसएमटीऐवजी दादरपर्यंत चालवण्यात येणार आहे. यामुळे प्रवाशांना खूप त्रास होणार आहे.

रेल अँड डेव्हलपमेंट ऑथोरिटीकडून सीएसएमटी स्थानकाचा पूनर्विकास होणार हे. यामध्ये फलाटांवरील पायाभूत सुविधा मजबूत करणे, ओव्हरहेड वायरची कामे तसेच सुरक्षेसंबंधित कामे केली जाणार आहेत. या कामांसाठी फलाट क्रमांक १६ आणि १७ बंद ठेवण्यात येणार आहे.

सीएसएमटीच्या फलाट क्रमांक १६ आणि १७ बंद असणार आहे. या फलाटावरुन अमरावती, अकोला, नागपूर, भुसावळ, जळगाव, नांदेड, लातूर या ठिकाणी गाड्या जातात. आता या गाड्या दादर स्थानकावरच थांबणार आहे. १ फेब्रुवारीपासून हे बदल होणार आहेत.

१ फेब्रुवारीपासून पुढील आदेश येईपर्यंत संबंधित गाड्या सीएसएमटीऐवजी दादरला थांबणार आहे. यामुळे प्रवाशांना अंतिम स्थानक दादरला उतरावे लागणार आहे. दरम्यान, ट्रेन क्रमांक १२१३४ मंगळुरु-सीएसएमटी एक्सप्रेस गाडी ठाणे स्थानकांपर्यंत धावणार असल्याची माहिती समोर आली आहे.