Mumbai Crime: हॉटेलमध्ये बोलावून घेतलं, चर्चेच्या बहाण्याने तरुणीवर बलात्कार, अमेरिकेत PHD करणाऱ्या तरुणाचं भयंकर कृत्य

लग्नाचे आमिष दाखवत मुंबईत एका तरुणीवर बलात्कार करण्यात आल्याची घटना समोर आली आहे. मुंबईतील वांद्रे पोलिस ठाण्यात या प्रकरणी तरुणीने दाखल केलेल्या तक्रारीवरून तरुणाविरोधात गुन्हा दाखल करण्यात आला आहे. २९ वर्षीय आरोपी तरुण अमेरिकेमध्ये पीएचडीचे शिक्षण घेत आहे. पीडित तरुणी या तरुणासोबत शिक्षण घेते. तरुण आणि तरुणीची आधी ओळख झाली. त्यानंतर मैत्रीचे रुपांतर प्रेमात झाले. तरुणाने तरुणीला लग्नाचे आमिष दाखवले त्यानंतर तिला हॉटेलवर नेत तिच्यावर बलात्कार केला. जर कुणाला सांगितले तर तुझा जीव घेईल अशी देखील धमकी आरोपीने तरुणीला दिली.

पोलिसांनी दिलेल्या माहितीनुसार, रिसर्च करणाऱ्या तरुणाने तरुणीला अभ्यासासाठी एका हॉटेलवर बोलावले होते. तरुणाने सांगितल्याप्रमाणे ती तिथे गेली. त्यानंतर त्याने तिच्यासोबत बलात्कार केला. ही घटना वांद्रे येथील एका हॉटेलमध्ये घडली. आरोपी लोअर परेलमध्ये राहतो आणि पीडिता माहिममध्ये राहते. आरोपीचे वडील एका खासगी बँकेत वरिष्ठ पदावर नोकरी करतात. पीडितेने या घटनेनंतर वांद्रे पोलिस ठाण्यात धाव घेत तक्रार दाखल केली त्यावेळी ही घटना उघडकीस आली.

तरुणीने केलेल्या तक्रारीनुसार, १ जानेवारी ते १२ जून दरम्यान वांद्रे येथील एका आलिशान हॉटेलमध्ये आणि अमेरिकेमध्ये राहत असताना तरुणाने तिच्यावर बलात्कार केला. आरोपी तरुण अमेरिकेतील एका विद्यापीठामध्ये पीएचडीचे शिक्षण घेत आहे. तो पीडितेला एका ओळखीच्या व्यक्तीमार्फत भेटला. पहिल्या भेटीनंतर ते पुन्हा भेटले. त्यांची मैत्री वाढत असताना त्याने तिला शिक्षणात मदत करतो असे सांगितले. त्यासाठी त्याने तिला वांद्रे येथील एका आलिशान हॉटेलवर बोलावले आणि तिथे त्याने तिच्यावर बलात्कार केला.

पीडितेने असा देखील आरोप केला आहे की, पीएचडीचा अभ्यास करणाऱ्या आरोपीने अमेरिकेत एकत्र राहत असतानाही तिचे लैंगिक शोषण केले होते. काही दिवसांनी पीडितेला कळले की आरोपी इतर महिलांशीही त्याच्या लग्नाबद्दल बोलत आहे. जेव्हा तिने याबद्दल आरोपीला जाब विचारला तर त्याने तिच्यावर हल्ला केला आणि गैरवर्तन केले. त्याने तिचे खासगी फोटो लीक करण्याची आणि तिला मारून टाकण्याची धमकीही दिली. यामुळे कंटाळून पीडितेने तिच्या आईला संपूर्ण कहाणी सांगितली आणि त्यानंतर आई-मुलीने वांद्रे पोलिस ठाण्यात धाव घेतली आणि तक्रार दाखल केली. पोलिसांनी आरोपीविरोधात गुन्हा दाखल करत तपास सुरू केला आहे.