शिवसेना भवनसमोर हनुमान चालिसा पठणासाठी मनसेचं मुख्यमंत्र्यांना पत्र

मुंबई: मनसेच्या (MNS) गुढी पाडवा मेळाव्यामध्ये राज ठाकरे यांनी मशिदींवरील भोंग्याचा मुद्दा उपस्थीत केला होता. यावरुन त्यांनी राज्य सरकारवर टीका केली होती. जर मशिदींवरील भोंग्यावर कारवाई केली नाहीतर आम्ही भोंग्यासमोर हनुमान चालिसा लावणार असल्याचा इशारा राज ठाकरे (Raj Thackeray) यांनी दिला होता. याच पार्श्वभूमीवर दोन दिवसापूर्वी मनसे कार्यकर्त्यांनी सेना भवन बाहेर हनुमान चालीसा भोंग्यावर लावली होती, त्यावेळी पोलिसांनी कार्यकर्त्यांवर कारवाई केली होती. यामुळे आता मनसेने मुख्यमंत्री उध्दव ठाकरे यांना पत्र पाठवून हनुमान जयंतीला सेना भवनसमोर हनुमान चालिसा पठणासाठी परवानगी देण्याची मागणी केली आहे.

महाराष्ट्र नवनिर्माण सेनेचे (MNS) नेते यशवंत किल्लेदार यांनी मुख्यमंत्री उध्दव ठाकरे यांना पत्र पाठवून सेना भवन समोर हनुमान चालिसा पठणासाठी परवानगी देण्याची मागणी केली आहे. मशिदीवरील भोंग्याच्या मुद्द्यावरुन मनसे कार्यकर्ते आक्रमक झाले आहेत.

यामुळे मुंबईत आता भोंग्यावरुन मनसे विरुध्द शिवसेना समोर येणार आहेत. मुंबईत मनसेच्या काही पदाधिकाऱ्यांनी कार्यालयाबाहेर भोंगे लावून त्यावर हनुमान चालिसा लावली होती, त्यावेळी पोलिसांनी कारवाई केली होती. यावर मनसेने शिवसेनेवर (Shivsena) टीका केल्या होत्या. भोंग्याच्या मुद्द्यावरुन आता मुंबईत राजकारण रंगणार असल्याचे दिसत आहे.

मशिंदीवरील भोंग्यावरुन मनसेच्या पुण्यातील काही पदाधीकाऱ्यांनी पदाचे राजीमाने दिले होते, यावरुन मनसे नेते वसंत मोरे यांनी वेगळी भूमीका मांडली होती. यामुळे राज ठाकरे वसंत मोरेंवर नाराज झाल्याच्या चर्चा सुरु होत्या. मोरे यांचे मनसे पुणे अध्यक्ष पद काढून घेण्यात आले होते. त्यामुळे मोरे नाराज असल्याच्या चर्चा सुरु होत्या, पण आता या चर्चांना पूर्णविराम मिळाला आहे.

काल (सोमवार) वसंत मोरे यांनी मुंबईत राज ठाकरे (Raj Thackeray) यांची भेट घेतली. या भेटीनंतर वसंत मोरे यांनी नाराजी दूर झाली असल्याचे सांगितले. आज राज राज ठाकरे यांची सभा होणार आहे. या सभेला वसंत मोरेंना निमंत्रण दिले असल्याचेही मोरे म्हणाले.

Edited By- Santosh Kanmuse