Maharashtra Vidhan Sabha Session : विरोधकांचा चहापानावर बहिष्कार, पण आमदार कपिल पाटील यांची हजेरी; राजकीय वर्तुळात चर्चांना उधाण

विधिमंडळाच्या पावसाळी अधिवेशनाला उद्या म्हणजे गुरुवारपासून सुरुवात होणार आहे. या पावसाळी अधिवेशनाच्या पूर्वसंध्येला सह्याद्री अतिथीगृहात चहापानाचा कार्यक्रम पार पडला.

सह्याद्री अतिथीगृहात या चहापानासाठी उपमुख्यमंत्री देवेंद्र फडणवीस, उपमुख्यमंत्री अजित पवार, मंत्री गुलाबराव पाटील, अतुल सावे आणि मंत्रिमंडळातील इतर सहकारी उपस्थित होते.

या चहापानावर विरोधकांनी बहिष्कार टाकला. त्यामुळे महाविकास आघाडीचे आमदार या चहापानाला दिसले नाहीत.

तर या चहापानाला लोकभारतीचे आमदार कपिल पाटील यांनी हजेरी लावली. कपिल पाटील हे मुंबई शिक्षक मतदारसंघाचे आमदार आहेत.

महाविकास आघाडीला पाठिंबा देणाऱ्या कपिल पाटील यांनी सत्ताधाऱ्यांसोबत चहापान केल्याने राजकीय वर्तुळात चर्चांना उधाण आलं आहे.

चहापानाला हजेरी लावल्यानंतर कपिल पाटील यांनी स्पष्टीकरण दिलं आहे. कपिल पाटील यांनी व्हिडिओ संवादाद्वारे याबाबत स्पष्टीकरण दिलं आहे.

'विरोधकांचा चहापानावर बहिष्कार असला तरी मी महाराष्ट्राची परंपरा जपण्यासाठी आणि माझं हे शेवटच अधिवेशन आहे. त्यामुळे एक महाराष्ट्राची परंपरा आहे. त्यामुळे मी चहापण च्या कार्यक्रमाला आलो आहे, असे कपिल पाटील यांनी स्पष्ट केले.

'एकीकडे एक भूमिका घ्यायची आणि सभागृहात वेगळी भूमिका घ्यायची असं मी अजिबात करत नाही, असेही कपिल पाटील यांनी स्पष्ट केले.