Mhada Homes: नवी मुंबईत घर घेण्याचं स्वप्न पूर्ण होणार, फक्त १४ लाखांत घर; म्हाडाकडून घरांची बंपर लॉटरी

मुंबई परिसरात आपलं हक्काचं घर असावं, असं प्रत्येकाचं स्वप्न असतं. पण अव्वाच्या सव्वा घरांच्या किमती पाहून आपण मुंबईत घर घेणं टाळतो. दरम्यान, ठाणे, कल्याणनंतर आता नवी मुंबईतील नागरिकांचंही घर घेण्याचं स्वप्न लवकरच पूर्ण होणार आहे. कारण म्हाडाच्या कोकण गृहनिर्माण व क्षेत्र विकास मंडळाने नवी मुंबईतील काही भागांमध्ये २९३ घरांसाठी लॉटरी काढली आहे. या घरांची किंमत फक्त १४ लाखांपासून सुरू होत आहे. त्यामुळे नवी मुंबईतील नागरिकांसाठी निश्चितच ही आनंदाची बातमी ठरणार आहे.

म्हाडाच्या कोकण गृहनिर्माण व क्षेत्र विकास मंडळाने ५,३६२ सदनिका आणि ७७ भूखंडांच्या विक्रीसाठी लॉटरी जाहीर केली आहे. यामध्ये नवी मुंबईतील दिघा, सानपाडा, नेरुळ, घणसोली आणि गोठेघर या भागांचाही समावेश आहे. या भागातील एकूण २९३ घरांचा समावेश असणार आहे. नवी मुंबईत घर खरेदीचा विचार करणाऱ्यांसाठी ही एक मोठी संधी आहे.

नवी मुंबईतील बीकेएस गॅलेक्सी रिएलेटर्स LLP दिघा या प्रकल्पातील घरे अत्यल्प उत्पन्न गटासाठी आहेत. अनामत रक्कम आणि अर्जाचे शुल्क, असे एकूण ५५९० रूपये रूपये भरावे लागणार आहेत. या प्रकल्पात ११२ घरे असून, घरांची किंमत १८ लाखांपासून सुरूवात आहे.

नवी मुंबई Pyramid developers नेरूळ येथील घरे अल्प उत्पन्न गटासाठी आहे. घरांची संख्या १८ असून, किंमत २३ लाखांपासून सुरूवात आहे. यासाठी अनामत आणि अर्जाची रक्कम असे एकूण १०,५९० भरावे लागणार आहे.

DPVG Ventures LLP सानपाडा, नवी मुंबईत अत्यल्प उत्पन्न गट आणि अल्प उत्पन्न गटासाठी १९ घरे आहेत. या प्रकल्पातील अत्यल्प गटातील घरांची किंमत १४ लाखांपासून सुरू होत आहे. या उत्पन्न गटासाठी २ घरे आहेत. तसेच याचं क्षेत्रफळ २९.६ चौ.मी इतकं आहे.

तर, अल्प गटासाठी १७ घरे असून, या घरांची किंमत १८ लाखांपासून सुरू होत आहे. घराचं क्षेत्रफळ ३७.१७२ ते ४९.९१८ चौरस मीटर इतकं आहे. अत्यल्प उत्पन्न गटासाठी ५,५९० रूपये आणि अल्प उत्पन्न गटासाठी १०,५९० रुपये भरावे लागणार आहे.

नवी मुंबईतील घणसोली येथे निलकंठ इन्फ्राटेक प्रकल्पात अल्प उत्पन्न गटासाठी १८ घरे उपलब्ध आहेत. या घरांची किंमत १६ लाखांपासून सुरूवात असून, घराचे क्षेत्रफळ ३२.५२२ ते ४८.१९४ चौरस मीटर इतके आहे. अनामत आणि अर्जाची रक्कम असे एकूण १०,५९० भरावे लागणार आहे.

सानपाडा, नवी मुंबई येथील कामधेनु ग्रँड्युअर या प्रकल्पात १७ घरे उपलब्ध आहेत. या घरांची किंमत २३लाखांपासून सुरूवात होत असून, घराचे क्षेत्रफळ ४२.३० ते ४९.९२ चौरस मीटर इतके आहे. अनामत आणि अर्जाची रक्कम असे एकूण १०,५९० भरावे लागणार आहे.

निलकंठ इन्फ्राटेक, मौजे घणसोली या ठिकाणी २१ घरे अल्प उत्पन्न गटासाठी उपलब्ध आहेत. या घरांची किंमत २३ लाखांपासून सुरूवात होत आहे. घराचे क्षेत्रफळ ३६.३२३ ते ४६.२२८ चौरस मीटर आहे. तर, अनामत आणि अर्जाची रक्कम असे एकूण १०,५९० भरावे लागणार आहे.

गोठेघर येथे ८८ घरे अल्प उत्पन्न गटासाठी उपलब्ध आहेत. या घरांची किंमत ३६ लाखांपासून सुरूवात होत असून, घराचे क्षेत्रफळ ४७.८५ चौरस मीटर इतके आहे. तर, अनामत आणि अर्जाची रक्कम असे एकूण १०,५९० भरावे लागणार आहे.