मुंबईकरांनो इथे लक्ष द्या! रेल्वेच्या कोणत्या मार्गावर मेगा ब्लॉक? पहा वेळापत्रक

मुंबईकरांसाठी अत्यंत महत्वाची बातमी समोर येत आहे. मध्य रेल्वेच्या हार्बर मार्गावर मेगा ब्लॉक घेण्यात आला आहे. दरम्यान, छत्रपती शिवाजी महाराज टर्मिनस आणि कल्याण स्थानकांदरम्यान मुख्य मार्गावर कोणताही मेगा ब्लॉक राहणार नाही. रविवारी बहुतांश कामगारांना सुट्टी असते. मात्र, ज्यांना महत्वाच्या कामानिमित्त किंवा फिरायचे असते, ते लोक लोकलमधूनच प्रवास करतात. जर आपण रविवारीही घराबाहेर पडणार असाल, लोकलने प्रवास करणार असाल, तर ही वेळापत्रक बघूनच घराबाहेर पडा.

रविवार, दिनांक १२.१०.२०२५ रोजी मध्य रेल्वेच्या हार्बर मार्गावर मेगा ब्लॉक राहणार आहे. छत्रपती शिवाजी महाराज टर्मिनस आणि कल्याण स्थानकांदरम्यान मुख्य मार्गावर कोणताही मेगा ब्लॉक राहणार नसल्याची माहिती रेल्वे प्रशासनाने दिली.

मध्य रेल्वे, मुंबई विभागात विविध अभियांत्रिकी आणि देखभाल कामांसाठी रविवार, दिनांक १२.१०.२०२५ मेगा ब्लॉक असणार आहे. रविवारी कुर्ला आणि वाशी स्थानकांदरम्यान अप आणि डाऊन हार्बर मार्गावर मेगा ब्लॉक राहणार आहे. कुर्ला आणि वाशी स्थानकांदरम्यान अप आणि डाऊन हार्बर मार्गावरील वाहतूक सकाळी ११.१० ते दुपारी १६.१० वाजेपर्यंत बंद राहील.

छत्रपती शिवाजी महाराज टर्मिनस मुंबई येथून सकाळी १०.३४ वाजल्यापासून ते दुपारी १५.३६ वाजेपर्यंत सुटणाऱ्या वाशी/बेलापूर/पनवेलकडे जाणाऱ्या डाउन हार्बर मार्गावरील गाड्या तसेच पनवेल/बेलापूर/वाशी येथून सकाळी १०.१७ वाजल्यापासून ते दुपारी १५.४७ वाजेपर्यंत छत्रपती शिवाजी महाराज टर्मिनस मुंबईकडे येणाऱ्या अप हार्बर मार्गावरील गाड्या रद्द राहतील.

ब्लॉकच्या कालावधीत छत्रपती शिवाजी महाराज टर्मिनस मुंबई – कुर्ला आणि पनवेल – वाशी या दरम्यान विशेष उपनगरी गाड्या चालविण्यात येतील.

ब्लॉकच्या कालावधीत सकाळी १०.०० वाजल्यापासून ते सायंकाळी १८.०० वाजेपर्यंत हार्बर मार्गावरील प्रवाशांना ठाणे – वाशी/नेरुळ स्थानकांदरम्यान प्रवास करण्यास परवानगी देण्यात आली आहे.

छत्रपती शिवाजी महाराज टर्मिनस आणि कल्याणदरम्यान मुख्य मार्गावर कोणताही मेगा ब्लॉक राहणार नाही. दरम्यान, प्रवाशांना होणाऱ्या गैरसोयीबद्दल रेल्वे प्रशासन दिलगीरी व्यक्त केली.