मोक्का लागलेल्या आरोपीला मानपाडा पोलिसांनी फिल्मी स्टाईलने केले गजाआड!

डोंबिवली : मोक्का लागलेल्या आरोपीला मानपाडा पोलिसांनी फिल्मी स्टाईलने आंबिवली येथून गजाआड केले आहे. हसनैन सय्यद असे या आरोपीचे नाव असून त्याच्याकडून 2 लाख 61 हजारांचा मुद्देमाल जप्त केला आहे. डोंबिवली (Dombivli) मधील मानपाडा पोलिस स्टेशनचे पोलिस अधिकारी सुनिल तारमळे यांच्या पथकाला या वस्तीत पाच वर्षापासून फरार असलेला आरोपी हसनैन सय्यद हा असल्याची माहिती मिळाली.

हे देखील पहा :

त्यानुसार डीसीपी सचिन गुंजाळ, एसीपी जे.डी.मोरे, वपोनी शेखर बागडे यांच्या मार्गदर्शनाखाली पोलिस अधिकाऱ्यांनी फिल्मी स्टाईलने छापा टाकला. या छाप्या दरम्यान हसनैन हा पोलिसांच्या (Police) ताब्यात सापडला. यावेळी पोलिसांसोबत काही नागरिकांची झटापटी झाल्याचे बोलले जात आहे.

दरम्यान, पोलिसांनी हसनैन सैय्यदला पोलिसांच्या गाडीत टाकले आणि त्याला घेऊन थेट मानपाडा पोलिस गाठले. हसनैन सय्यद हा देशात चैन स्नॅचिंगचा मोठा गुन्हेगार (Criminal) मानला जातो. 20 गुन्ह्यात तो फरार होता. त्याच्या विरोधात मोक्काही (Mokka) लावण्यात आला आहे. पाच वर्षानंतर हसनैनला पकडण्यात पोलिसांना यश आले आहे.

Edited By : Krushnarav Sathe