मोठी दुर्घटना! साइडिंगला उभ्या असलेल्या मुंबई लोकलला आग; २ डबे जळून खाक

मुंबईतून मोठी बातमी हाती आली आहे. मुंबईत आज बुधवारी रात्रीच्या सुमारास मध्य रेल्वेच्या मार्गावर साइडिंगला उभ्या असलेल्या कचरा उचलणाऱ्या लोकलला आग लागल्याची घटना घडली आहे. कचरा उचलणाऱ्या या लोकलला आग लागल्याने प्रशासकीय कर्मचाऱ्यांमध्ये एकच खळबळ उडाली. लोकलला नेमकी कशी आग लागली,याचे कारण अद्याप समोर आलेले नाही.

मध्य रेल्वेवरील कुर्ला आणि विद्याविहार रेल्वे स्थानकांदरम्यान साइडिंगला उभ्या असलेल्या लोकलला ही आग लागली. कचरा उचलण्यासाठी वापरात असलेली ही लोकल सायडिंगला उभी होती. सुरुवातीला धूर मोठ्या प्रमाणात बाहेर निघू लागला. त्यानंतर आग लागली.

काही वेळाने ही आग पसरत गेली. लोकलच्या सुरुवातीच्या दोन डब्यापर्यंत ही आग पोहोचली. बघता बघता आगीनं रौद्ररूप धारण केलं. या घटनेची माहिती मिळताच रेल्वे प्रशासनातील अधिकारी-कर्मचारी आणि अग्निशमन कर्मचाऱ्यांनी धाव घेतली. ही आग नेमकी कशामुळे लागली, याबाबत अद्याप ठोस माहिती समजू शकलेली नाही.

तत्पूर्वी, लोकल ट्रेनला आग लागल्याने मध्य रेल्वेची वाहतूक विस्कळीत झाली आहे. या आगीमुळे छत्रपती शिवाजी महाराज टर्मिनसच्या दिशेने जाणारी वाहतूक वाहतूक खोळंबली आहे. आगीच्या दुर्घटनेमुळे सीएसएमटीच्या दिशेला जाणारी अप लाइन तात्पुरती बंद करण्यात आली आहे.

व्हिडिओमध्ये काय दिसत आहे?

कुर्ला आणि विद्याविहारमध्ये साइडिंगला कचरा उचलणारी ट्रेन उभी होती. या ट्रेनमध्ये अचानक आग लागली. ट्रेनच्या दोन डब्याला आग लागली. ट्रेनला आग लागल्याने धुराचे लोट परिसरात पसरू लागले. आगीचा धूर परिसरात पसरल्यानंतर इतर ट्रेन थांबवण्यात आल्या. रेल्वेचे अधिकारी आणि अग्निशमन दलाचे जवान आग विझविण्यासाठी घटनास्थळी पोहोचल्याचे दिसत आहे.