Pune : पुणेकरांना दिलासा! चाकण, शिरूर, रावेत, नऱ्हे, हडपसर मार्गावरील वाहतूक कोंडी सुटणार, उन्नत मार्ग अन्... ; काय आहे नेमका प्लान?

पुणेकरांसाठी महत्त्वाची बातमी समोर आली आहे. शहरातील वाहतूक कोंडी सोडवण्यासाठी महामार्गासह चार महत्त्वाच्या मार्गांच्या उन्नतीसाठी एनएचएआय आणि एमएसआयडीसीमध्ये करार करण्यात आला आहे. या कराराचा पुणे, पिंपरी चिंचवड शहरांसह, हिंजवडी आयटीपार्क, चाकण औद्योगिक वसाहत आणि उपगनगरांना मोठा फायदा होणार आहे.

‘एनएचएआय’ने रावेत ते नऱ्हे या २५ किलोमीटर लांबीच्या उन्नत महामार्गाचा तांत्रिक अभ्यास सुरू केला आहे. त्याबरोबर पुणे ते शिरूर, तळेगाव-चाकण-शिक्रापूर आणि हडपसर-यवत या तीन महत्त्वाच्या मार्गांची क्षमता, वाढ आणि उन्नत मार्गांचे ‘MSIDC’मार्फत नियोजन करण्यात येत आहे. त्यासाठी ‘NHI’ने एकत्रित विकासकामे करण्यासाठी हा करार केला आहे, असे NHI कडून स्पष्ट करण्यात आले.

रावेत-नऱ्हे आणि पुणे-मुंबई द्रुतगती मार्ग हे शहरातील महत्त्वाचे प्रवेशद्वार म्हणून ओळखले जात असून, या मार्गांवरून दैनंदिन सरासरी १.५ लाखांहून अधिक वाहने ये-जा करतात. चिंचवड, निगडी, आकुर्डी, थेरगाव, वाकड, हिनजवडी आणि नऱ्हे या परिसरात वाहतूक कोंडी वाढत आहे. त्यामुळे हा उन्नत मार्ग प्रस्तावित करण्यात आला आहे. जमिनीपासून १० ते १२ मीटर उंचीवरून सरळमार्गे अवजड आणि शहराबाहेर पडण्यासाठी इच्छुक वाहनांना मार्ग मिळाली, तर त्याखालील मार्गावरील वाहतूक सुरळीत होईल, असे NHI चे प्रकल्प संचालक संजय कदम यांनी सांगितले.

पुढे ते म्हणाले, ‘रावेत ते नऱ्हे हा ६ पदरी उन्नत मार्ग सुमारे ४० ते ४५ किमी लांबीचा असेल. याबाबत सविस्तर प्रकल्प अहवाल तयार करण्याचे काम सुरू आहे. तसेच इतर तीन मार्गांसाठी ‘MSIDC’बरोबर करार करण्यात आला आहे. पुणे-शिरूर आणि चाकण-शिक्रापूर हा औद्योगिक परिसर असल्याने या मार्गावर अवजड वाहनांची नेहमी ये जा असते. हडपसर-यवत मार्गावरून सोलापूरच्या दिशेने जाणारी वाहने अधिक आहेत. त्यामुळे बारामती-फलटण या दिशेने जाणाऱ्या वाहतुकीवरही वाहतूक कोंडीचा ताण पडत आहे. त्यामुळे या चारही प्रकल्पांचा एकत्रित विकास झाल्यास शहराच्या वाहतुकीत मुलभूत बदल होईल.’