ठरलं! कल्याण-डोंबिवली, उल्हासनगर, ठाण्यात महायुतीचा महौपार; मुंबईचं काय?

महायुतीच्या गोटातून मोठी बातमी हाती आली आहे. कल्याण-डोंबिवली, उल्हासनगर, ठाण्यात महायुतीचा महापौर होणार असल्याची माहिती भाजप प्रदेशाध्यक्ष रविंद्र चव्हाण यांनी दिली आहे. या महापालिकांच्या महापौरपदाचा अंतिम निर्णय मुख्यमंत्री देवेंद्र फडणवीस दावौस दौऱ्यावरून आल्यानंतर होणार असल्याचेही चव्हाण यांनी स्पष्ट केले. परंतु मुंबई महापालिकेबाबत काय निर्णय घेणार, ही बाब गुलदस्त्यात आहे.

कल्याण-डोंबिवली, उल्हासनगर आणि ठाण्यात शिंदे गट इतर राजकीय पक्षाच्या मदतीने सत्ता स्थापनेसाठी प्रयत्न सुरू केले आहेत. या तिन्ही महापालिकेत शिंदे गटाने पावले उचलल्याने भाजपचं टेन्शन वाढलं होतं. तिन्ही पालिकेत भाजप आणि शिंदेसेनेत तोडगा न निघाल्याने एकनाथ शिंदेंनी भाजपला वगळून सत्ता स्थापन करण्यासाठी प्रयत्न सुरू केले आहेत. मात्र, भाजपने अचानक शिंदे गटासोबत सत्ता स्थापनेसाठी युती करण्यासाठी पाऊल पुढे टाकलं आहे. परंतु या युतीचा अंतिम निर्णय मुख्यमंत्री देवेंद्र फडणवीस घेणार असल्याचे भाजप प्रदेशाध्यक्षांनी जाहीर केले.

मुख्यमंत्री देवेंद्र फडणवीस दौऱ्यावरून परतल्यावर मुंबईत एकनाथ शिंदे यांच्यासोबत एकत्रित बैठक होणार आहे. भाजप प्रदेशाध्यक्ष रविंद्र चव्हाण आणि उपमुख्यमंत्री एकनाथ शिंदे यांची या तिन्ही महानगरपालिका मध्ये महायुतीचा महापौर होण्यासंदर्भात यापूर्वीच गेल्या आठवड्यात झालेल्या भेटीत सविस्तर चर्चा झाली आहे. तीनही महानगरपालिकेमध्ये महायुतीला जनादेश मिळाला आहे. त्यामुळे या जनादेशानुसारच तीनही महानगरपालिकेत महायुतीचीच सत्ता स्थापन होणार आहे, अशी भाजप प्रदेशाध्यक्ष रवींद्र चव्हाण यांची माहिती आहे.

तत्पूर्वी, मुंबई महापालिकेत महायुतीचा महापौर होणार असल्याचंही भाजपच्या वरिष्ठ नेत्यांकडून सांगण्यात आहे. याचदरम्यान दुसरीकडे शिंदे गटाने मुंबईच्या महापौरपदावर दावा केला आहे. शिंदे गटाने अडीच वर्षांसाठी महापौरपदाची मागणी केल्याची सूत्रांकडून माहिती मिळत आहे. शिंदे गटाने मुंबईच्या महापौरपदासाठी मागणी केल्यानंतर ठाण्यातही भाजपने महापौरपदासाठी मागणी केली होती. त्यानंतर तिन्ही पालिकेच्या महापौरपदावर रविंद्र चव्हाण यांनी मोठं भाष्य केल्याने पुन्हा एकदा चर्चांना उधाण आलं आहे.