Maharashtra Politics: पुण्यात मोठी राजकीय घडामोड, पहिल्यांदाच दोन्ही शिवसेना एकत्र निवडणूक लढवणार

Summary -

• ठाकरे गट आणि शिंदे गट पुण्यात पहिल्यांदाच एकत्र

• ठाकरे अन् शिंदे गट एकत्र निवडणूक लढवणार

• चाकणमध्ये नगरपरिषद निवडणूक लढवत आहेत

• मनीषा गोरे यांच्यासाठी दोन्ही शिवसेना एकत्र

रोहिदास गाडगे, पुणे

राजकीय वर्तुळातून सर्वात मोठी बातमी समोर आली आहे. पुणे जिल्ह्यात मोठी राजकीय घडामोड घडली. याठिकाणी पक्षफुटीनंतर शिवसेना पहिल्यांदाच एकत्र निवडणूक लढणार आहे. राज्यात कुठंच एकत्र न आलेली ठाकरे अन् शिंदेंची शिवसेना चाकणमध्ये एकत्र आली आहे. त्यामुळे राजकीय वर्तुळात चर्चांना उधाण आले आहे.

शिंदे शिवसेनेच्या नगराध्यक्ष पदाच्या उमेदवार मनिषा सुरेश गोरे यांचा अर्ज भरायला स्वतः ठाकरेंचे स्थानिक आमदार बाबाजी काळे आणि शिंदेचे आमदार शरद सोनवणे उपस्थित होते. त्यांचे एकत्रित फोटो आणि व्हिडीओ देखील समोर आले आहेत. यामुळे शिवसेना शिंदेगट आणि शिवसेना ठाकरेगट एकत्र आले असल्याची बोलले जात आहे.

खेड-आळंदीचे दिवंगत आमदार सुरेश गोरेंच्या पश्चात ही पहिली निवडणूक पार पडत आहे. त्यांच्या पत्नी नगरपरिषदेच्या नगराध्यक्ष पदी उभ्या राहिल्यात. अशाप्रसंगी राजकारण बाजूला ठेऊन दिवंगत आमदार गोरेंना आदरांजली म्हणून आम्ही केवळ नगराध्यक्ष पदासाठी मनीषा गोरेंना पाठिंबा दिलाय, असे म्त स्थानिक आमदार बाबाजी काळे यांनी व्यक्त केले. त्यामुळं ही युती म्हणता येणार नाही असे देखील सांगितले जात आहे.

उद्धव ठाकरे असो वा संपर्क प्रमुख सचिन अहिर यांनी स्थानिक स्वराज्य संस्थांच्या निवडणुकीत स्थानिक पातळीवर निवडणूक घेण्याच्या सूचना दिल्यात. त्यामुळे हा चाकण पुरता तो ही नगराध्यक्ष पदापुरता निर्णय आहे. तालुक्यातील राजगुरुनगर आणि आळंदीत ही आम्ही स्वबळावर लढतोय, अशी माहिती आमदार बाबाजी काळे यांनी दिली.