Maharashtra Politics: पुण्यात शिंदेंच्या शिवसेनेला खिंडार, बड्या नेत्याचा राष्ट्रवादीत प्रवेश

Summary -

• नाशिकच्या भोर नगरपालिकेत शिवसेना शिंदे गटाला मोठा धक्का बसला

• शिवसेना शिंदेगटाचे उपनेते नितीन सोनवले यांनी राष्ट्रवादीमध्ये प्रवेश केला

• या पक्षप्रवेशामुळे पुण्यात राष्ट्रवादीची ताकद वाढली

स्थानिक स्वराज्य संस्थांच्या निवडणुकीच्या रणधुमाळीमध्ये पुण्यात मोठा राजकीय भूकंप झाला आहे. पुण्यात शिवसेना शिंदे गटाला राष्ट्रवादी काँग्रेस अजित पवार गटाने जोरदार धक्का दिला आहे. बड्या नेत्याने शिंदेच्या शिवसेनेला रामराम ठोकला असून राष्ट्रवादी काँग्रेस अजित पवार गटात प्रवेश केला आहे. त्यामुळे स्थानिक स्वराज्य संस्थांच्या निवडणुकीच्या मतदानापूर्वी पुण्यात राष्ट्रवादी काँग्रेसचे ताकद वाढली आहे.

पुणे जिल्ह्यातील भोर नगरपालिका निवडणुकीत एकनाथ शिंदे यांना धक्का बसला आहे. पुण्यातील भोर नगरपालिकेच्या निवडणुकीत नगराध्यक्ष पदासाठी शिंदे यांच्या शिवसेना पक्षाकडून उमेदवारी अर्ज भरणाऱ्या शिवसेनेचे भोर शहरप्रमुख नितीन सोनवले यांनी राष्ट्रवादी काँग्रेस अजित पवार गटामध्ये पक्षप्रवेश केला. भोर नगरपालिका निवडणुकीत अजित पवार यांच्याविरोधात संग्राम थोपटे अशी थेट लढत होणार आहे.

राष्ट्रवादीचे भोरचे आमदार शंकर मांडेकर यांच्या उपस्थितीमध्ये नितीन सोनवले यांनी राष्ट्रवादी काँग्रेसमध्ये पक्षप्रवेश केला. नितीन सोनवले शिवसेनेकडून भरलेला नगराध्यक्षपदाचा उमेदवारी अर्ज माघारी घेणार आहेत. राष्ट्रवादीमध्ये पक्ष प्रवेश करून निवडणूकीत राष्ट्रवादीसाठी काम करणार असल्याचे नितीन सोनवले यांनी स्पष्ट केले. भोर नगरपालिकेवर भाजपचे संग्राम थोपटे यांचं वर्चस्व असल्याने भाजपला चितपट करण्यासाठी राष्ट्रवादीचा डाव असल्याची चर्चा सुरू आहे.

शिवसेनेचा उमेदवार माघार घेत असल्याने भोर नगरपालिका निवडणुकीत आता भाजप विरुद्ध राष्ट्रवादी असा महायुतीतच सामना रंगणार आहे. भोर नगरपालिकेत २० जागा आहेत. मागच्या निवडणूकित १८ जागा होत्या. मागच्या निवडणुकीत सर्व जागांवर काँग्रेसचे संग्राम थोपटे यांचे उमेदवार निवडून आले होते. आता संग्राम थोपटे भाजपमध्ये गेले आहेत आणि सध्या भाजपची ताकत नगरपालिकेमध्ये जास्त आहे.