Ajit Pawar News : शिवसेनेला मोठा धक्का! काका - पुतणे करणार राष्ट्रवादी काँग्रेसमध्ये प्रवेश

येवल्यात शिवसेना उद्धव बाळासाहेब ठाकरे पक्षाला मोठे खिंडार पडले असून मंत्री छगन भुजबळ यांच्या विरोधात दोनदा निवडणूक लढवलेले शिवसेनेचे सहसंपर्कप्रमुख संभाजी पवार आणि माजी आमदार मारुती पवार यांच्यासह राष्ट्रवादी काँग्रेस अजित पवार गटात प्रवेश करत आहे.

राज्यात शिवसेना उद्धव बाळासाहेब ठाकरे पक्षाची गळती सुरूच आहे. नाशिकच्या मालेगाव पाठोपाठ येवल्यात माजी आमदार मारोतराव पवार यांच्यासह शिवसेनेचे सह संपर्कप्रमुख संभाजी पवार या काका पुतण्याने मंत्री छगन भुजबळ यांच्या सूचनेनुसार उपमुख्यमंत्री अजित पवार यांच्या उपस्थितीत मुंबई येथे प्रवेश करण्याचा निर्णय घेतला आहे.

आज दुपारी मुंबई येथे प्रवेश सोहळा आयोजित करण्यात आला असून शेकडो कार्यकर्त्यांचा जथ्था घेऊन संभाजी पवार समर्थक हे मुंबईच्या दिशेने रवाना झाले आहेत. संभाजी पवार यांच्यासोबत माजी आमदार मारोतराव पवार, युवा सेना माजी उपजिल्हाप्रमुख बापू गायकवाड, पंचायत समितीचे माजी सभापती व आदिवासी नेते प्रवीण गायकवाड, कृषी उत्पन्न बाजार समितीचे माजी सभापती अरुण काळे, विद्यमान संचालक कांतीलाल साळवे, खरेदी-विक्री संघाचे माजी चेअरमन दिलीपराव मेंगाळ हे राष्ट्रवादी काँग्रेस पक्षात प्रवेश करणार आहेत.

तसेच पंचायत समितीचे माजी सभापती विठ्ठलराव आठशेरे, कृषी उत्पन्न बाजार समितीचे माजी संचालक दीपक जगताप, या प्रमुख पदाधिकाऱ्यांसह तालुक्यातील प्रमुख ग्रामपंचायतचे सरपंच, विविध कार्यकारी सोसायटीचे चेअरमन व शेतकरी प्रतिनिधीं हे राष्ट्रवादी काँग्रेस पक्षाचे प्रमुख तथा राज्याचे उपमुख्यमंत्री अजित दादा पवार यांच्या उपस्थितीत प्रवेश करणार आहेत.