विधानसभा निवडणुकीसाठी राज्यातील सर्वच राजकीय पक्षांनी जोरदार तयारी सुरू केली आहे. राजकीय पक्षांच्या बैठकांवर बैठका सुरू आहेत. काही पक्षाचे उमेदवार देखील निश्चित झाले आहेत तर काहींनी उमेदवारांच्या नावाची देखील घोषणा केली आहे. अशामध्ये आम आदमी पार्टीने महाराष्ट्रात विधानसभा निवडणूक लढवण्याचे ठरवले आहे. आपने पुण्याकडे आपला मोर्चा वळवला आहे. आपकडून पुण्यातील सर्वच्या सर्व जागांवर निवडणूक लढणार असल्याचे जाहीर करण्यात आले आहे.
आम आदमी पार्टी पुणे शहरातील सर्व जागा लढणार आहे. आम आदमी पार्टीच्या वतीने विधानसभेसाठी पुणे शहरातील आठही जागांवर उमेदवार देणार आहे. निवडणुकीत पक्षाच्या वतीने उच्चशिक्षित उमेदवार दिले जाणार असल्याची माहिती पक्षाकडून देण्यात आली आहे. महाराष्ट्रात सत्तानाट्य, कोयता गँग, महिला अत्याचार, युवा बेरोजगार, शेतकरी आत्महत्या या विषयावर आप विधानसभा निवडणूक लढवणार आहे.
मागच्या महिन्यामध्ये आम आदमी पार्टीने महाराष्ट्रात विधानसभा निवडणूक लढवण्याची घोषणा केली होती. राज्यातील २८८ विधानसभा मतदारसंघातून उमेदवार देण्याची घोषणा आम आदमी पक्षाच्या वतीने करण्यात आली होती. आपकडून उमेदवारी मिळावी यासाठी फक्त पक्षातीलच नाही तर अन्य पक्षातील बरीच नेते मंडळी इच्छुक आहेत.
आम आदमी पक्षाच्या वतीने २५ ऑगस्ट २०२४ रोजी परभणी येथे पत्रकार परिषदेचे आयोजन करण्यात आले होते. या पत्रकार परिषदेला राज्य संघटन मंत्री संग्राम घाडगे पाटील, परभणी जिल्हाध्यक्ष सतीश चकोर यांच्यासह अनेक पदाधिकारी उपस्थित होते. यावेळी त्यांनी मराठवाड्यातील तीन विधानसभा मतदारसंघातील उमेदवारांच्या नावाची घोषणा केली होती.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.