Ladki Bahin Yojana : ई-केवायसी केल्यानंतरही लाडकी बहीण योजनेचा हप्ता आला नाही; नेमकी काय चूक झाली?

राज्यात मुख्यमंत्री माझी लाडकी बहीण योजनेचा डिसेंबर महिन्याचा हप्ता महिलांना मिळणे सुरू झाला आहे. मात्र, काही लाभार्थी महिलांच्या बँक खात्यात डिसेंबर महिन्याचा हप्ता जमा झालेला नाही. लाभार्थी महिलांनी ई-केवायसी करूनही हप्ता न मिळाल्याने नाराजी पसरली आहे. आता ई-केवायसी नव्हे, तर उत्पन्नासारखे इतर निकष महत्वाचे असल्याचे समोर आलं आहे. पात्र आणि अपात्र महिलांच्या फरकामुळे अनेक लाभार्थ्यांचे पैसे रोखले गेल्याची माहिती मिळत आहे.

काही महिलांना डिसेंबरचा हप्ता मिळालेला नाही. डिसेंबरचा हप्ता मिळावा, यासाठी अनेक महिलांनी घाईघाईने केवायसी केली होती. परंतु काही महिला योजनेच्या निकषात बसत नसल्याने त्यांची केवायीसी होऊनही हप्ता मिळालेला नाही. केवायसी करताना महिलांना त्यांच्या वडील आणि पतीचं उत्पन्न सांगावं लागतं. ज्या कुटुंबाचं उत्पन्न हे २.५ लाखांपेक्षा अधिक असेल, त्यांना या योजनेचा लाभ दिला जात नाहीये. याआधी अनेक महिलांनी अपात्र असतानाही लाडकी बहीण योजनेचा लाभ घेतला होता. त्यामुळे गेल्या काही महिन्यांपासून सरकारने लाभार्थी महिलांना केवायसी बंधनकारक केली होती.

सरकारने म्हटलं होतं की, 'योजनेसाठी केवायसी ३१ डिसेंबरपर्यंत करण्याचं आवाहन लाडक्या बहि‍णींना केलं होतं. केवायसी करणाऱ्यांना लाडकी बहीण योजनेचे पैसे मिळणार असल्याचे जाहीर केले होते. परंतु आता केवायसी करण्याची अंतिम तारीख निघून गेली आहे. त्याचबरोबर अनेक महिला आता निकषात बसत नसल्याचं अधिकाऱ्यांकडून सांगण्यात येत आहे. दुसरीकडे आता पात्र महिलांना डिसेंबरचा हप्ता मिळाला आहे. त्यांचं आता जानेवारी महिन्याच्या हप्त्याकडे लक्ष लागलं आहे.

लाडकी बहीण योजना विधानसभा निवडणुकीत महायुतीसाठी गेमचेंजर ठरली होती. देशभरात प्रसिद्ध असलेल्या योजनेतून महिलांना दरमहा १५०० रुपये आर्थिक मदत दिली जाते. महायुती सरकारकडून मकरसंक्रांतीच्या दिवशी डिसेंबर महिन्याचा हप्ता बँक खात्यात जमा करणार असल्याचे जाहीर केले होते. त्यावेळी काही जणांच्या खात्यात पैसे जमा झाले. मात्र, अनेक महिलांच्या खात्यात पैसे जमा न झाल्याने मोठा गोंधळ निर्माण झाल्याचे पाहायला मिळत आहे.