Manoj Jarange News : विधानसभा निवडणुकीत मनोज जरांगेंची माघार, कुणाचा होणार मोठा फायदा? VIDEO

मुंबई : विधानसभा निवडणुकीतल्या राजकारणाने कळस गाठला आहे. सोमवारी अर्ज माघारी घेण्याची शेवटची तारीख असताना मोठ्या घडामोडी घडल्या. लोकसभा निवडणुकीत मराठा आरक्षण-जरांगे फॅक्टरने सत्ताधारी युतीला मोठा फटका बसला होता. त्यामुळे विधानसभेला सर्वच पक्षीय नेत्यांनी मराठा आंदोलक मनोज जरांगेंची भेट घेतलीये. जरांगे कुठल्या मतदारसंघात कोण उमेदवार देणार याची उत्सुकता होती. अंतरवाली सराटीत मंथन आणि इच्छुकांच्या बैठका सुरु असतानाच जरांगेंनी शेवटच्या क्षणी विधानसभा निवडणुकीतून माघार घेतली आहे. राज्यभरातल्या सर्व मराठा उमेदवारांनी आपापले अर्ज मागे घेण्याचं आवाहन केलंय. लढायची नाही तर आता उमेदवार पाडायचा असा निर्धार त्यांनी केलाय.

मनोज जरांगे यांनी विधानसभा निवडणुकीत शेवटच्या दिवशी माघार घेण्याची घोषणा केली. आपल्याला निवडणूक लढायची नाही. एका जातीवर जिंकणं शक्य नाही, असं म्हणत मनोज जरांगे यांनी माघार घेण्याची घोषणा केली. जरांगेंनी घेतलेल्या माघारीवर ओबीसी आंदोलक लक्ष्मण हाकेंनी जोरदार टीका केली आहे. बारामतीच्या आदेशानंतर जरांगेंनी पळ काढल्याचा आरोप हाकेंनी केला आहे.

'बारामतीच्या आदेशानंतर जरांगेंनी पळ काढला, अशा शब्दात हाकेंनी टीका केली. हाकेंच्या टीकेनंतर, मी हाकेंना मोजत नसल्याची प्रतिक्रिया जरांगेंनी साम टीव्हीच्या ब्लॅक अँड व्हाईटच्या विशेष मुलाखतीत दिलीय.

दरम्यान, गेल्या वर्षभरापासून मराठा आरक्षणावरुन राज्यातलं राजकीय आणि सामाजिक वातावरण ढवळून निघालं. मराठा-ओबीसींमध्ये दरी निर्माण झाली आहे. लोकसभा निवडणुकीवर त्याचा मोठा परिणाम पाहायला मिळाला. आता निवडणुकीतून जरांगेंनी माघार घेतल्यानं लोकसभेसारखाच मविआला फायदा होणार की आणखी काही सत्तेची नवी गणितं जुळणार याकडे राज्याचं लक्ष लागलंय.