मुंबई गोवा महामार्गावर वन विभागाची माेठी कारवाई; दाेन ट्रकसह एक काेटीचा माल पकडला

- सचिन कदम

महाड : गेल्या काही दिवसांपासून इंडोनेशियावरुन जंगली वनस्पती पासून तयार करण्यात आलेले कात सदृश्य पदार्थ व पावडरची तस्करी होणार असल्याची माहिती महाड (mahad) वन विभागाला (forest department) मिळाली होती. या माहितीच्या आधारे वन विभागाने छापा टाकून दोन ट्रक (truck) जप्त केले आहेत. या ट्रकची तपासणी करण्यात आली असता त्यामध्ये कात सदृश्य खडे व पावडरच्या गोणी आढळून आल्या. (mahad crime news)

वन विभागाने त्यांना मिळालेल्या माहितीनूसार मुंबई गोवा महामार्गावर पाळत ठेवली. पोलादपूर (poladpur) येथील वनविभागाच्या तपासणी नाक्यावर दोन ट्रक जात असताना त्यांना थांबवण्यात आले. ट्रकची तपासणी करण्यात आली असता त्यामध्ये कात सदृश्य खडे व पावडरच्या गोणी आढळून आल्या.

सर्व गोणी जप्त करण्यात आली आहेत. त्यानंतर ट्रक चालक दीपक किशोर घोसाळकर (राहणार बोरज, खेड) आणि सचिन मंगेश कदम (राहणार खोपी, खेड) यांना चौकशीसाठी ताब्यात घेण्यात आले आहे. हा सर्व माल एक कोटीचा असून दोन ट्रक देखील वन विभागानं ताब्यात घेतले आहेत. याप्रकरणी वन संरक्षित कायदा ४१ आणि ४२ प्रमाणे गुन्हा दाखल करण्यात आला आहे. दरम्यान जप्त करण्यात आलेला वनपोज फॉरेनसिक लॅबमध्ये तपासणीसाठी पाठवण्यात आले आहे.

Edited By : Siddharth Latkar