हळवे-सहृदयी व्यक्तिमत्व हरपले; शरद पवारांची अनिल अवचट यांना श्रद्धांजली

रश्मी पुराणिक

मुंबई : ज्येष्ठ सामाजिक कार्यकर्ते अनिल अवचट (Anil Awachat) यांचे वयाच्या 77 व्या वर्षी निधन झाले. राहत्या घरीच त्यांनी अखेरचा श्वास घेतला आहे. अनिल अवचट यांना राष्ट्रवादीचे जेष्ठ नेते शरद पवार यांनी श्रद्धांजली वाहिली आहे. (Sharad Pawar Pays Homage To Anil Awachat)

शरद पवार म्हणाले, ज्येष्ठ साहित्यिक, विचारवंत, पत्रकार डॉ. अनिल अवचट यांच्या निधनाने डोळसपणे सामाजिक क्षेत्रात योगदान देणारे हळवे-सहृदयी व्यक्तिमत्व हरपले. मुक्तांगण व्यसनमुक्ती केंद्राच्या माध्यमातून त्यांनी केलेले भरीव कार्य तळागाळातील अनेकांसाठी नव्या आयुष्याची सुरुवात ठरले. शोकाकुल अवचट कुटुंबियांच्या दुःखात आम्ही सहभागी आहोत. दिवंगत अनिल अवचट यांना भावपूर्ण श्रद्धांजली!

दरम्यान, मुक्तांगणचे संस्थापक आणि ज्येष्ठ सामाजिक कार्यकर्ते अनिल अवचट यांचे थोड्या वेळापूर्वी राहत्या घरी निधन झाले. अवचट यांच्या पायावर चार दिवसांपूर्वी शस्त्रक्रिया झाली होती. दोन दिवसांपूर्वीच त्यांना घरी आणण्यात आले होते. आज सकाळी त्यांची प्रकृती बिघडली त्यानंतर ते कोमामध्ये गेले आणि सकाळी सव्वा नऊ वाजता त्यांचे निधन झाले. त्यांच्यामागे मुक्ता आणि यशोदा या दोन मुली आहेत.