Maharashtra Political News : वंचित गेम चेंजर ठरणार? प्रकाश आंबेडकर महाविकास आघाडीसाठी महत्त्वाचे का? वाचा सविस्तर

Maharashtra Political News :

आगामी लोकसभा निवडणुकीच्या पार्श्वभूमीवर महाविकास आघाडीची महत्त्वाची बैठक काल मंबईत पार पडली. वंचित बहुजन आघाडीचे प्रमुख प्रकाश आंबेडकर यांनाही या बैठकीचं निमंत्रण देण्यात आलं होतं. मात्र प्रकाश आंबेडकर या बैठकीला उपस्थित राहिले नाहीत. तरी देखील महाविकास आघाडीचे नेते प्रकाश आंबेडकर आपल्यासोबत येतील असा दावा करत आहेत.

प्रकाश आंबेडकर यांनी सोबत यावे यासाठी महाविकास आघाडीचे सर्वोतोपरी प्रयत्न सुरु आहेत. मात्र अद्याप याबाबत तोडगा निघालेला नाही. वंचितची शिवसेनेसोबत युती झाली आहे. शरद पवारांसोबतही प्रकाश आंबेडकर यांची चर्चा झाली आहे. कॉंग्रेसचे काही नेतेही आंबेडकरांच्या संपर्कात आहेत. मात्र महाविकास आघाडी प्रकाश आंबेडकर यांना सोबत घेण्यासाठी एवढी आग्रही का आहे, हे देखील तितकचं महत्त्वाचं आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

प्रकाश आंबेडकर महाविकास आघाडीसाठी महत्त्वाचे का?

वंचितला महाविकास आघाडीमध्ये सहभागी करुन घ्यावं असा आग्रह वाढत आहे. काँग्रेस राष्ट्रवादीला २०१९ च्या विधानसभा आणि लोकसभा निवडणुकीत मोठा फटका बसला होता. काँग्रेस-राष्ट्रवादीला अनेक जागा वंचितमुळे गमवाव्या लागल्या होत्या.

२०२९ च्या निवडणुकीत फटका

सुशीलकुमार शिंदे, अशोक चव्हाण,राजेंद्र शिंगणे, राजू शेट्टी, माणिकराव ठाकरे अशा बड्या नेत्यांना वंचितने विजयापासून दूर ठेवलं होते. वंचितच्या उमेदवारांनी मिळवलेल्या मतांचा फटका काँग्रेस राष्ट्रवादीच्या उमेदवारांना बसला होता. वंचितचा थेट फायदा भाजपला झाला होता. त्यामुळे युतीचे जवळपास ८-९ खासदार ज्यादा निवडून आले होते.

मतांचं विभाजन टाळता येईल

वंचित बहुजन आघाडीचे मतदार आणि महाविकास आघाडीचे मतदार प्रामुख्याने महायुतीविरोधी आहेत. त्यामुळे प्रकाश आंबेडकर सोबत आले तर मतदारांमधील विभाजन टाळता येईल. दलित मतदारांमध्ये प्रकाश आंबेडकरांचा मोठा प्रभाव आहे. त्याचा फायदा महाविकास आघाडीला होऊ शकतो.