बदलापुरात राष्ट्रवादीचे जोडेमारो आंदोलन

बदलापूर : राष्ट्रवादीचे अध्यक्ष शरद पवार यांच्या घरावर झालेल्या हल्ल्यानंतर बदलापुरात आज राष्ट्रवादीच्या कार्यकर्त्यांनी जोडेमारो आंदोलन केले. एसटी कामगारांना चिथावणी देणाऱ्या ऍड.गुणरत्न सदावर्ते (Gunratna Sadavarte), भाजप नेते आमदार गोपीचंद पडळकर, सदाभाऊ खोत आणि किरीट सोमय्या यांच्या फोटोला जोडे मारून निषेध करण्यात आला.

हे देखील पहा :

राष्ट्रवादीचे अध्यक्ष शरद पवार (Sharad Pawar) यांच्या सिल्व्हर ओक या निवासस्थानी काल संपकरी एसटी कर्मचाऱ्यांनी धडक दिली. यावेळी पवारांच्या घरावर काही आंदोलकांनी दगडफेक आणि चप्पलफेक केली. या कर्मचाऱ्यांना वकील गुणरत्न सदावर्ते यांच्यासह भाजपच्या काही नेत्यांनी चिथावल्याचा राष्ट्रवादीचा (NCP) आरोप आहे. याचा निषेध करण्यासाठी बदलापुरात (Badlapur) राष्ट्रवादी काँग्रेसचे ठाणे जिल्हा ग्रामीण उपाध्यक्ष अविनाश देशमुख यांच्या नेतृत्वाखाली जोडेमारो आंदोलन करण्यात आले.

वकील गुणरत्न सदावर्ते, भाजप आमदार गोपीचंद पडळकर (Gopichand Padalkar), सदाभाऊ खोत (Sadabhau Khot) आणि भाजपचे माजी खासदार किरीट सोमय्या (Kirit Somaiyya) यांच्या फोटोला यावेळी जोडे मारण्यात आले. यावेळी पोलिसांनी या नेत्यांचे फोटो असलेला बॅनर जप्त करत राष्ट्रवादीच्या कार्यकर्त्यांना ताब्यात घेतलं. यावेळी एसटी कर्मचाऱ्यांनी कुणाच्याही चिथावणीखोर वक्तव्याला भुलू नका, असं आवाहन राष्ट्रवादी काँग्रेसचे ठाणे (Thane) जिल्हा ग्रामीण उपाध्यक्ष अविनाश देशमुख यांनी केलं.

Edited By : Krushnarav Sathe