केडीएमसीमध्ये लाचखोरीचा स्फोट! ३ अधिकाऱ्याला पैसे घेताना रंगेहाथ पकडले, ठाणे जिल्ह्यात खळबळ

अभिजित देशमुख, कल्याण प्रतिनिधी

Thane ACB traps KDMC officials for accepting ₹25,000 and ₹40,000 bribes : एका दिवसात केडीएमसीच्या तीन अधिकाऱ्यांना लाच घेताना रंगेहात पडकण्यात आल्याने एकच खळबळ उडाली आहे. ठाणे लाचलुचपत विभागाने आज ही कारवाई केली. आजारी कर्मचाऱ्याला पुन्हा सेवेत घेण्यासाठी २५ हजार, तर बांधकाम परवानगीसाठी ४० हजारांची लाच स्वीकारताना अटक करण्यात आली. आतापर्यंत ४७ केडीएमसी अधिकारी व कर्मचारी लाचखोरी प्रकरणात अडकल्याने महापालिकेतील भ्रष्टाचार उघड झाला आहे.

ठाणे लाचलुचपत विभागाची मोठी कारवाई

कल्याण-डोंबिवली महापालिकेतील (KDMC) भ्रष्टाचारावर ठाणे लाचलुचपत विभागाने मोठा घाव घातला आहे. एकाच दिवशी केडीएमसीचे तिघे अधिकारी लाच घेताना रंगेहात अटकेत आले आहेत. ही कारवाई केडीएमसीच्या घनकचरा व्यवस्थापन विभाग आणि बांधकाम विभागात झाली आहे वसंत देवळूरकर (घनकचरा विभाग) ,सुदर्शन जाधव (घनकचरा विभाग),रवींद्र आहिरे (सहाय्यक अभियंता, बांधकाम विभाग) असे या तिन्ही अधिकाऱ्यांची नावे आहेत.

घनकचरा विभागातील वसंत देवळूरकर आणि सुदर्शन जाधव यांनी आजारी कर्मचाऱ्याला पुन्हा सेवेत घेण्यासाठी २५ हजार रुपयांची लाच मागितली होती. त्यातील २० हजार रुपये स्वीकारताना त्यांना अटक करण्यात आली. दुसरीकडे, सहाय्यक अभियंता रवींद्र आहिरे याने बांधकाम परवानगी देण्यासाठी एका बांधकाम व्यावसायिकाकडून ४० हजारांची लाच घेताना रंगेहात पकडला गेला.केडीएमसीच्या इतिहासात आतापर्यंत ४७ अधिकारी व कर्मचारी लाचलुचपत विभागाच्या जाळ्यात सापडले आहेत. ही आकडेवारी महापालिकेतील वाढत्या भ्रष्टाचाराची गंभीरता दाखवते.