KDMC : कल्याण-डोंबिवलीत भूमिपुत्रांची पालिकेवर धडक! २७ गावांचा क्लस्टर योजनेला विरोध, कारण काय?

संघर्ष गांगुर्डे, कल्याण

Kalyan Dombivli Municipal Corporation 27 Village Protest कल्याण डोंबिवली महानगरपालिका क्षेत्रातील २७ गावांमध्ये क्लस्टर योजनेला भूमिपुत्रांनी तीव्र विरोध दर्शवला, असून आज शेकडो नागरिकांनी केडीएमसी मुख्यालयावर धडक दिली. २७ गाव सर्वपक्षीय हक्क संरक्षण संघर्ष समितीच्या नेतृत्वाखाली काढण्यात आलेल्या या मोर्चामुळे पालिका प्रशासनाची चांगलीच धावपळ उडाली. आंदोलकांनी केवळ घोषणाबाजीच केली नाही, तर सरकारच्या निर्णयाच्या परिपत्रकाची होळी करून आपला संताप व्यक्त केला.

केडीएमसी हद्दीतील २७ गावांच्या विकासासाठी शासनाकडून क्लस्टर योजना राबवण्याचा निर्णय घेण्यात आला आहे. मात्र, ही योजना स्थानिक रहिवाशांच्या हिताची नसल्याचा दावा नागरिकांनी केला. आज झालेल्या आंदोलनादरम्यान संतप्त ग्रामस्थांनी महापालिका मुख्यालयासमोर सरकारचा निषेध केला. यावेळी क्लस्टर योजनेशी संबंधित सरकारी परिपत्रकाचे कागद फाडण्यात आले आणि त्याची होळी करून प्रशासनाचा निषेध करण्यात आला. या आंदोलनामुळे परिसरात काही काळ तणावाचे वातावरण निर्माण झाले होते.

ग्रामस्थांचे म्हणणे आहे की, क्लस्टर योजना, ग्रोथ सेंटर आणि बुलेट ट्रेन बिझनेस हब यांसारख्या विविध योजनांमुळे २७ गावांतील स्थानिक नागरिक व भूमिपुत्रांवर परिणाम होत आहे. २७ गावांचा विकास नाही, सुविधा नाही तर मग मालमत्ता कराची सक्ती चालणार नाही अशी भूमिका यावेळी या नागरिकांनी घेतली.

यावेळी मोर्चेकऱ्यांच्या शिष्टमंडळाने केडीएमसीचे अतिरिक्त आयुक्त योगेश गोडसे यांची भेट घेत आपल्या मागण्या मांडल्या. यावेळी अतिरिक्त आयुक्तांनी शिष्टमंडळाचे म्हणणे ऐकत लवकरच केडीएमसी महापौर, आयुक्त, २७ गावांतील लोकप्रतिनिधी आणि संघर्ष समिती यांची संयुक्त बैठक लावून यावर तोडगा काढण्याचे आश्वासन दिले असल्याचे अध्यक्ष सुमित वझे यांनी सांगितले.