Kalyan Crime: कल्याणमध्ये भरचौकात तरुणीसोबत अश्लील वर्तन, पोलिसांनी तासाभरात आरोपीला ठोकल्या बेड्या

• कल्याणमध्ये तरुणीसोबत गैरवर्तन केल्याचा धक्कादायक प्रकार समोर

• पोलिसांनी आरोपीला तासाभरात केली अटक

• जोशीबाग परिसरातील धक्कादायक घटना

• महिलांच्या सुरक्षेचा प्रश्न पुन्हा ऐरणीवर

संघर्ष गांगुर्डे, कल्याण

कल्याणमध्ये भररस्त्यात २२ वर्षीय तरुणीसोबत तरुणाने अश्लील वर्तन केल्याचा धक्कादायक प्रकार समोर आला आहे. तरुणी घराच्या दिशेने जात असताना आरोपी त्याठिकाणी आला. त्याने तरुणीसोबत अश्लील वर्तन केले आणि पळून गेला. या घटनेत तरुणी प्रचंड घाबरली. तिने या प्रकरणी पोलिस ठाण्यात धाव घेत तक्रार दाखल केली. घटनेचे गांभीर्य लक्षात घेऊन पोलिसांनी अवघ्या काही तासांत आरोपीला बेड्या ठोकल्या. या घटनेमुळे कल्याणमध्ये खळबळ उडाली आहे.

मिळालेल्या माहितीनुसार, कल्याणमधील जोशीबाग परिसरात २२ वर्षीय तरुणीसोबत भररस्त्यात गैरवर्तन झाल्याची धक्कादायक घटना समोर आली. या घटनेमुळे परिसरात संतापाचे वातावरण निर्माण झाले असून नागरिकांनी आरोपीविरोधात कठोर कारवाईची मागणी केली आहे. पीडित तरुणी रस्त्याने चालत असताना प्रथमेश जाधव नावाचा तरुण तिच्यासमोर आला. त्याने तरुणीसोबत गैरवर्तन करत अश्लील प्रकार केल्याचा आरोप आहे.

घटना घडल्यानंतर आरोपी तेथून पळ काढला. या प्रकारामुळे परिसरातील नागरिक आणि महिलांमध्ये भीतीचे वातावरण निर्माण झाले. घटनेची माहिती मिळताच महात्मा फुले चौक पोलिसांनी तातडीने तपास सुरू केला. पोलिसांनी सीसीटीव्ही फुटेज आणि स्थानिकांच्या मदतीने आरोपीचा शोध घेत अवघ्या एका तासाच्या आत भाजी विक्रेता तरुण प्रथमेश जाधवला अटक केली. पोलिसांनी आरोपीविरोधात संबंधित कलमान्वये गुन्हा दाखल करून पुढील तपास सुरू केला आहे. या घटनेनंतर महिलांच्या सुरक्षेचा प्रश्न पुन्हा ऐरणीवर आला आहे.