Kalyan : कल्याणमध्ये दुचाकी चोरीचा पर्दाफाश, सराईत चोर अटकेत; १.९५ लाखांचा मुद्देमाल जप्त

संघर्ष गांगुर्डे, कल्याण

गेल्या काही दिवसांमध्ये कल्याण डोंबिवलीमध्ये चोरांचा सुळसुळाट वाढला आहे. अशातच बाजारपेठ पोलीस स्टेशनच्या गुन्हे प्रकटीकरण पथकाने मोठी कारवाई करत मोटारसायकल चोरीच्या मालिकेचा पर्दाफाश केला. याप्रकरणी एका सराईत आरोपीला बेड्या ठोकल्या आहेत. या चरोट्याने आग्रा येथून डुप्लिकेट चावी आणून कल्याण शहरात दुचाकी चोरी केल्या. पोलिसांनी आरोपीकडून चार मोटारसायकल जप्त करण्यात आल्या असून सुमारे १ लाख ९५ हजार रुपयांचा मुद्देमाल हस्तगत केला आहे.

कल्याण बाजारपेठ पोलिसांना मोटर सायकल चोरी करणारा आरोपी कल्याणमध्ये येणार असल्याची माहिती मिळाली होती त्यानुसार, त्यांनी कल्याण पश्चिमेकडील बोंबिल गल्ली परिसरात सापळा रचून पोलिसांनी शाहरूख जाकीर हुसेन वय २७ वर्ष याला अटक केली. तो मूळचा आग्रा येथील असून सध्या कल्याणमध्ये फिरस्ता म्हणून राहत होता.

दिनांक २ मार्च २०२६ रोजी गुन्हे प्रकटीकरण पथकाला मिळालेल्या खात्रीशीर माहितीनुसार आरोपी चोरीस गेलेली मोटारसायकल घेऊन उभा असल्याचे समोर आले. त्यानुसार पोलिसांनी तत्काळ कारवाई करत त्याला ताब्यात घेतले. तपासादरम्यान आरोपीने गेल्या ५ ते ६ महिन्यांत कल्याण शहरातील विविध ठिकाणांहून वेगवेगळ्या कंपनीच्या दुचाकी चोरी केल्याची कबुली दिली. त्याच्याकडून एकूण ४ मोटारसायकली जप्त करण्यात आल्या असून चार गुन्ह्यांचा उलगडा करण्यात यश आले आहे.

सदर गुन्हे महाराष्ट्र पोलीस अंतर्गत बीएनएस कलम ३०३(२) प्रमाणे नोंदविण्यात आले आहेत. आरोपीस अटक करून न्यायालयासमोर हजर केले असता पोलीस कोठडी रिमांड मंजूर करण्यात आली आहे.अशी माहिती कल्याणचे सहाय्यक पोलीस आयुक्त कल्याणजी घेटे यांनी दिली.