Maharashtra Politics : एकनाथ शिंदेंच्या बालेकिल्ल्यात भाजपची नवी खेळी; जितेंद्र आव्हाड यांचा कट्टर समर्थक फोडला

ठाणे : आगामी महापालिका निवडणुकीच्या पार्श्वभूमीवर भाजपने एकनाथ शिंदे यांचा बालेकिल्ला समजला जाणाऱ्या ठाण्यात मोठी खेळी खेळली आहे. जितेंद्र आव्हाड यांचे कट्टर समर्थक, माजी नगरसेवक अमित सरैय्या यांनी भाजपमध्ये प्रवेश करण्याचा निर्णय घेतला आहे. त्यानंतर भाजपचे प्रदेशाध्यक्ष रविंद्र चव्हाण यांच्या उपस्थितीत त्यांनी कमळ हाती घेतलं.

अमित सरैय्या यांच्यासोबत स्थानिक कार्यकर्त्यांनी भाजपमध्ये प्रवेश केला आहे. सरैय्या यांना पक्षात घेऊन उपमुख्यमंत्री एकनाथ शिंदे यांच्या मतदारसंघात भाजपने नवा डाव टाकल्याचे बोलले जात आहे. सरैय्या यांच्या पक्षप्रवेशामुळे वागळे इस्टेट परिसरातील राजकीय समीकरण बदल्याची शक्यता व्यक्त केली जात आहे.

अमित सरैय्या यांच्या पक्षप्रवेशामुळे जितेंद्र आव्हाड यांना मोठा धक्का बसला आहे. सरैय्या यांचा आज दुपारी चार वाजता भाजप प्रदेशाध्यक्ष रविंद्र चव्हाण यांच्या उपस्थितीत पक्षप्रवेश पार पडला.

अमित सरैय्या यांनी २०१२ साली सावरकरनगर प्रभागातून निवडणूक लढवून शिवसेनेचे माजी नगरसेवक दिलीप बारकटक्के यांचा पराभव केला होता. त्यानंतर २०१७ साली झालेल्या निवडणुकीत सरैय्या यांना पराभवाला सामोरे जावं लागलं. तरीही सरैय्या या भागात प्रभावी राजकीय नेते म्हणून ओळखले जातात.

नंदुरबारात शरद पवारांना मोठा धक्का

नंदुरबार जिल्ह्यात भाजपमध्ये अनेक दिवसांपासून मोठ्या प्रमाणात इन्कमिंग सुरू असल्याचं पाहायला मिळत आहे. शहादा तालुक्यातील शरद पवारांच्या राष्ट्रवादीला भाजपने मोठा धक्का दिलाय. शरद पवारांच्या राष्ट्रवादीच्या महिला जिल्हाध्यक्ष मंजुळाताई पाडवी यांच्यासह अनेक आजी-माजी पदाधिकारी तथा कार्यकर्त्यांनी शेकडोच्या संख्येने भाजमध्ये पक्ष प्रवेश केला आहे. या पक्षप्रवेशामुळे नंदूरबारमध्ये आगामी काळात होणाऱ्या स्थानिक स्वराज्य संस्थेच्या निवडणुकीत भाजपाला मोठं फायदा होणार आहे.