School Bus Accident: मुंबईत भरधाव वेगात जाणाऱ्या स्कूल बसचा अपघात, चालकासह अनेक विद्यार्थी जखमी

संजय गडदे, साम टीव्ही, प्रतिनिधी

मुंबईच्या सांताक्रुज परिसरात शालेय विद्यार्थ्यांना घरी घेऊन जाणाऱ्या स्कूल बसचा भीषण अपघात झाला. सांताक्रुज पश्चिमेकडील मॅनोर इंटरनॅशनल स्कूलची ही बस असून भरधाव वेगात असल्यामुळे वाहनावरील चालकाचे नियंत्रण सुटल्याने हा अपघात झाला. या अपघातात बस चालकासह एकूण सहा जण जखमी झाले आहेत.

यात चार विद्यार्थी आणि बसमधील आया हिचा देखील समावेश आहे अपघातात बसचे मोठ्या प्रमाणावर नुकसान झाले असून चालकाच्या डोक्याची कवटी देखील फुटली असल्याचे समजते.

सध्या जखमींवर सांताक्रुज येथील नानावटी रुग्णालयात उपचार सुरू आहेत. याप्रकरणी पालकांनी वाकोला पोलीस ठाण्यात चालका विरोधात तक्रार दिली असून पोलिसांनी गुन्हा दाखल केला आहे.

वाहन चालकाने गाडी चालवताना मद्यपान केले होते का? याबाबत वाकोला पोलीस तपास करत आहेत. मात्र वाहन चालकाकडून झालेल्या या अपघातामुळे पालकांमध्ये आणि विद्यार्थ्यांमध्ये आता भीतीचे वातावरण पसरले आहे.