Pune : पुणे जिल्ह्यात पावसाचा जोर ओसरला; धरणांत ६.७५ टीएमसी पाण्याची आवक

पुणे जिल्ह्यातील घाटमाथा आणि धरणक्षेत्रात गेल्या काही दिवसांपासून सुरू असलेल्या दमदार पावसानंतर रविवारी पावसाचा जोर काहीसा कमी झाला. मुळशी धरण परिसरात सर्वाधिक ५५ मिलिमीटर पावसाची नोंद झाली. गेल्या २४ तासांत जिल्ह्यातील धरणांमध्ये तब्बल ६.७५ टीएमसी पाण्याची आवक झाली असून, १ जूनपासून आतापर्यंत ४१४.२४ टीएमसी पाणी धरणांमध्ये दाखल झाले आहे. आवक सुरू असल्याने जिल्ह्यातील २४ धरणांतून विसर्ग कायम ठेवण्यात आला आहे.

मुळशी, मावळ, भोर, वेल्हा तसेच घाटमाथ्यावरील भागात झालेल्या पावसामुळे धरणांच्या पाणलोट क्षेत्रात मोठ्या प्रमाणात पाणी जमा झाले. रविवारी पावसाने काहीशी उघडीप दिल्याने आवकेचा वेग मंदावला असला, तरी अधूनमधून सरी सुरू असल्याने धरणांमध्ये पाण्याची आवक कायम आहे. त्यामुळे मुठा, पवना, भीमा, भामा, इंद्रायणी, कानंदी, कऱ्हा, कुकडी आणि घोड नद्यांचा प्रवाह सुरूच आहे.

मुठा खोऱ्यात टेमघर येथे १८ मिलिमीटर, तर नीरा खोऱ्यात भाटघर येथे २२ आणि नीरा देवघर येथे २० मिलिमीटर पाऊस झाला. घाटमाथ्यावर वळवण येथे ३४, लोणावळा २९ आणि कुंडली येथे २६ मिलिमीटर पावसाची नोंद झाली.

पश्चिम भागातील पावसामुळे भात उत्पादक पट्ट्यात पाण्याची उपलब्धता समाधानकारक आहे. पावसाने घेतलेली उघडीप भात पिकातील अतिरिक्त पाण्याचा निचरा होण्यासाठी फायदेशीर ठरत आहे. मात्र, पूर्व भागात पावसाचे प्रमाण कमी असल्याने बारामती, इंदापूर, दौंड आणि शिरूर परिसरातील सोयाबीन, बाजरी, मका, कडधान्ये आणि चारा पिकांना आणखी पावसाची आवश्यकता आहे.