Sachin Gaad Saam TV
बदलापूर येथील शाळकरी मुलींवर झालेल्या लैंगिक अत्याचाराची घटना ताजी असतानाच आता मुंबईतही एक संतापजनक घटना घडली. शेजाऱ्याच्या घरी खेळायला गेलेल्या ४ वर्षीय चिमुकलीवर एका नराधमाने लैंगिक अत्याचार केला. इतकंच नाही, तर तिला जीवे मारण्याची धमकी देखील दिली. यासंदर्भात तक्रार प्राप्त झाल्यानंतर पोलिसांनी आरोपीला तातडीने अटक केली. त्याच्यावर पोस्को कायद्याअंतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, चिमुकलीवर अत्याचाराची ही घटना गोरेगावच्या (Mumbai Crime News) प्रेमनगर परिसरात घडली. आरोपी हा २९ वर्षीय असून तो पीडितेच्या घराशेजारी राहतो. कुटुंबियांची चांगली ओळख असल्याने पीडिता नेहमी आरोपीच्या घरी खेळायला जायची. याचाच फायदा घेऊन आरोपीने घरात कुणी नसताना पीडितेवर लैंगिक अत्याचार केला.
पीडित चिमुकली आरोपीच्या घरी गेल्यानंतर आरोपीने तिच्या शरीराचे लचके तोडले. घडलेली घटना कुणालाही सांगितल्यास तुझ्या आई-वडिलांना जीवे मारेल, अशी धमकी देखील आरोपीने पीडितेला दिली. घडलेल्या प्रकारानंतर पीडितेची तब्येत बिघडली. आईने तिची पाहणी केली असता चिमुकलीवर अत्याचार झाल्याचे उघड झाले.
त्यांनी तातडीने पोलिसांत धाव घेत तक्रार दाखल केली. घटनेचे गांभीर्य पाहता गोरेगाव पोलिसांनी (Goregaon Police) तातडीने आरोपीवर गुन्हा दाखल करत त्याला अटक केली. अत्याचारानंतर पीडितेला गंभीर दुखापत झाली आहे. तिच्यावर सध्या कूपर रुग्णालयात उपचार सुरु आहे. या घटनेनं परिसरातून संताप व्यक्त होत आहे.
कोल्हापूर शहरातील राधानगरी परिसरातही एका ९ वर्षीय चिमुकलीवर लैंगिक अत्याचार झाल्याची घटना घडली. खासगी क्लासमध्ये शिकणाऱ्या एका ७३ वर्षीय आरोपीने पीडितेसोबत संतापजनक कृत्य केलं. याप्रकरणी पोलिसांनी आरोपीला अटक केली असून त्याच्यावर पोस्को कायद्याअंतर्गत गुन्हा दाखल केला आहे. श्रीपती भोसले, असं अटक करण्यात आलेल्या आरोपीचे नाव आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.