Raosaheb Danve : रावसाहेब दानवे यांच्या कारला लोणावळ्यात अपघात, दुचाकीची जोरदार धडक

Raosaheb Danve accident, Lonavala car accident : माजी केंद्रीय मंत्री रावसाहेब दानवे यांच्या कारचा लोणावळ्यातील जयचंद चौकात अपघात झाला. काही कामानिमित्त रावसाहेब दानवे हे लोणावळ्यातील बाजारपेठेत आले होते. त्यावेळी एका दुचाकीस्वाराने त्यांच्या कारला मागील बाजूने जोरदार धडक दिली. या अपघातानंतर दुचाकीस्वाराने स्वतःची चूक असतानाही स्थानिक तरुणांना गोळा करून हुज्जत घातली.

कारच्या बाहेर जास्त प्रमाणात गोंधळ सुरू झाल्यानंतर रावसाहेब दानवे गाडीतून बाहेर आले. त्यावेळी उपस्थितांना त्यांची ओळख पटली. दानवे हे माजी केंद्रीय मंत्री असल्याचे समजताच गोंधळ मिटवण्याचा प्रयत्न झाला. एका रिक्षाचालकाने मध्यस्थी करत वाद मिटवायचा प्रयत्न केला. पण दुचाकीस्वार काही केल्या ऐकायचं नाव घेत नव्हता. स्वतःची चूक असून देखील दुचाकी स्वाराने स्थानीक तरुणांना गोळा करत दानवे यांच्याशी हुज्जत घालण्याचा प्रयत्न केला. रिक्षाचालकाने हा वाद मिटवला. या अपघातामुळे लोणावळा बाजारपेठ येथील सीसीटीव्हीचा भोंगळ कारभार समोर आला आहे.

अपघाताची माहिती मिळताच लोणावळा पोलिसांनी घटनास्थळी धाव घेतली. पोलिसांनी घटनास्थळी पंचनामा केला. त्यानंतर दुचाकीस्वाराविरोधात तक्रार दाखल करण्यात आली. या अपघातामध्ये कुणालाही दुखापत झालेली नाही. रावसाहेब दानवे यांच्या कारचे आणि दुचाकीचे नुकसान झाले. दानवे आणि दुचाकीस्वारामध्ये १५ मिनिटे वाद सुरू होता. रिक्षाचालकाच्या मध्यस्थीनंतर हा वाद मिटला.