पुण्यात FIITJEE स्कॅम, ३१ विद्यार्थ्यांची ४५ लाख रुपयांची फसवणूक

अक्षय बडवे, पुणे प्रतिनिधी

FIITJEE Scam in Pune : पुण्यात FIITJEE स्कॅम झाल्याचं समोर आले आहे. यामझ्ये ३१ विद्यार्थ्यांची ४५ लाख रुपयांची फसवणूक करण्यात आली आहे. याप्रकरणी जून २०२४ पासून आत्तापर्यंत अनेक विद्यार्थ्यांना फी परत मिळाली नाही. विद्यार्थ्यांना ऑनलाइन बैठकीत क्लास बंद होणार याची माहिती दिली होती. पुण्यातील स्वारगेट पोलिस ठाण्यात फिटजी क्लासेसच्या संचालकासह चौघांवर गुन्हा दाखल करण्यात आला आहे.

पुण्यामध्ये तब्बल ३१ विद्यार्थ्यांची ४५ लाख २३ हजार ४५४ रुपयांना फसवणूक केल्याचे तक्रारीत उल्लेख करण्यात आला आहे. याप्रकरणी बरकत कादरी (वय ४८) यांनी स्वारगेट पोलिसांत तक्रार दिली. यावरून फिटजी या खासगी संस्थेचा व्यवस्थापक संचालक दिनेशकुमार गोयल, मनीष आनंद, राजीव बब्बर तसेच राजेशकुमार कर्ण यांच्यावर गुन्हा दाखल करण्यात आळा आहे.

मिळालेल्या माहितीनुसार, हा सगळा प्रकार २१ जून २०२४ ते २९ मे २०२५ या दरम्यान घडला आहे. पुण्यातील स्वारगेट भागात असणाऱ्या वेगा सेंटर या इमारतीतील फिटजी या कंपनीचे क्लासेस सुरू होते. विद्यार्थ्यांकडून या खाजगी संस्थेने हजारो रुपये फी च्या स्वरूपात घेतले होते. पोलिसांमध्ये या प्रकरणी गुन्हा दाखल करण्यात आला आहे. स्वारगेट पोलिसांकडून याबाबत कारवाई सुरू आहे.

दरम्यान, तक्रारदार यांनी या संस्थेत त्यांच्या मुलाचा प्रवेश सुरुवातीला २८ हजार ८०० रुपये भरून होता. त्यांनी एकूण ७५ हजार ३०० रुपये भरले होते. मात्र, अचानकच राजेशकुमार कर्म याने पालकांची ऑनलाइन मीटिंग बोलावली आणि क्लास बंद झाला असल्याचे जाहीर केलं. पालकांनी भरलेल्या फी बाबत वारंवार मेलद्वारे विचारणाकरून सुद्धा अनेकांचे पैसे अजूनही परत मिळाले नसल्याचे समोर आलं आहे. एकूण ३१ पालकांची ४५ लाख २३ हजार रुपयांना फसवणूक केल्याचं समोर आलं आहे.