Mumbai News : आधी आईला दारू पाजली, नंतर मुलीवर बलात्कार केला; धक्कादायक घटनेनं मुंबई हादरली

पत्नीला दारु पाजून एका नराधम बापाने आपल्या 13 वर्षीय मुलीवर लैंगिक अत्याचार केला. हा प्रकार कुणालाही सांगितल्यास जीवे मारण्याची धमकीही दिली. ही संतापजनक घटना मुंबईमधील पश्चिम उपनगरात घडली. याप्रकरणी पीडित मुलीच्या मावशीने दिलेल्या तक्रारीवरून पोलिसांनी आरोपीविरोधात गुन्हा दाखल केलाय.

मिळालेल्या माहितीनुसार, पीडित 13 वर्षीय मुलगी मुंबईतील पश्चिम उपनगर परिसरात राहते. तिच्या वडिलांना दारुचे व्यसन आहे. 27 जुलै रोजी पीडित मुलीचा बाप घरी दारु घेऊन आला. त्याने आपल्या पत्नीसोबत बसून मद्यपान केले.

मद्यपान केल्यानंतर पीडितेच्या आईच्या शुद्ध हरपली. याच गोष्टीचा फायदा घेऊन आरोपी बापाने आपल्या 13 वर्षीय मुलीवर बलात्कार केला. हा प्रकार कुणालाही सांगितल्यास तुला जीवे मारून टाकेन, अशी धमकी देखील आरोपीने पीडितेला दिली.

या संपूर्ण प्रकारानंतर पीडिता प्रचंड घाबरली. तिने सुरुवातीला हा प्रकार कुणालाही सांगितला नाही. मात्र, काही दिवसांनी पीडितेला तिची मावशी भेटायला आली. तेव्हा पीडित मुलीने आपल्यासोबत घडलेला सर्व प्रकार मावशीला सांगितला.

जन्मदात्या बापानेच मुलीवर अत्याचार केल्याचं कळताच मावशीच्या पायाखालची जमीनच सरकली. त्यांनी तातडीने मुलीला सोबत घेऊन पोलीस ठाणे गाठले. याप्रकरणी पोलिसांनी आरोपीविरोधात बालकांचे लैंगिक अपराधापासून संरक्षण कायद्याअंतर्गत (पोक्सो) गुन्हा दाखल केला आहे. घटनेचा अधिकचा तपास पोलीस करीत आहेत.