Sanjay Shirsat : आधी म्हणाले श्रीकांत शिंदेंना इनकम टॅक्सनं नोटीस पाठवली, गदारोळ होताच शिरसाटांचा यू टर्न

मुंबई : राज्याचे उपमुख्यमंत्री एकनाथ शिंदे यांचे सुपूत्र आणि कल्याणचे खासदार श्रीकांत शिंदे यांना आयकर खात्याने नोटीस पाठवल्याची धक्कादायक माहिती संजय शिरसाटांनी माध्यमांसमोर दिली. त्यानंतर एकच गदारोळ उडाला आणि त्यानंतर पुन्हा एकदा संजय शिरसाटांनी आपलं वक्तव्य मागे घेतलं आणि म्हणाले की, मला याबाबत काही माहिती नाहीय, असं स्पष्टीकरण शिरसांटांनी दिलं आहे.

मुंबईत सध्या राज्य विधिमंडळाचे अधिवेशन सुरू आहे. मात्र, हे अधिवेशन सोडून एकनाथ शिंदे हे काल अचानक दिल्लीत गेले होते. त्यांची ही दिल्लीवारी गुप्त होती. आज सकाळी याबाबतची माहिती समोर आली. दिल्लीत एकनाथ शिंदे यांना काही बडे नेते आणि केंद्रीय मंत्र्यांची भेट घेतल्याची माहिती आहे. अशातच संजय शिरसाटांनी श्रीकांत शिंदेंना आयकर विभागाची नोटीस आल्याचं वक्तव्य केलं आणि एकच गदारोळ झाला. श्रीकांत शिंदे यांना आयकर खात्याची नोटीस आल्याच्या बातमीनं राजकीय वर्तुळात खळबळ उडाली. तेवढ्यात एकनाथ शिंदे विधानभवनात दाखल झाले आणि काही वेळातच संजय शिरसाटांनी माध्यमांसमोर येऊन स्पष्टीकरण दिलं आणि श्रीकांत शिंदे यांच्याबाबत केलेलं आपलं वक्तव्य मागे घेतलं.

संजय शिरसाट स्पष्टीकरण देताना म्हणाले की, 'मला आयकर विभागाची नोटीस आली, हे स्पष्ट केलं. मला काही पत्रकारांनी विचारलं श्रीकांत शिंदेंनासुद्धा नोटीस आली आहे का? तर मी म्हटलं श्रीकांत शिंदेंना सुद्धा जरी नोटीस आली असेल तर मला माहीत नाही. श्रीकांत शिंदे यांना नोटीस आली की नाही हे मला माहित नाही'.

आधी संजय शिरसाट काय म्हणालेले?

शिंदे गटाचे मंत्री संजय शिरसाट यांनी प्रसारमाध्यमांशी बोलताना अनावधनाने याबाबतची माहिती सांगितली. संजय शिरसाट यांनी म्हटले की, 'आयकर विभाग हा प्रत्येकाची तपासणी करत असतो. मला नोटीस आली आहे, श्रीकांत शिंदे साहेबांना नोटीस आली आहे. आणखी कोणाला नोटीस येत असेल. त्यामुळे आम्ही आयकर विभागाला उत्तर द्यायला बांधील आहोत. मला ९ तारखेला उत्तर द्यायला सांगितलं होतं. मी त्यांच्याकडे वेळ मागून घेतला आहे', असं संजय शिरसाट यांनी आधी म्हटलेलं.