Nagar Kalyan Highway News : धनगर आरक्षणासाठी नगर- कल्याण महामार्गावर रास्ता राेकाे

- सुशिल थाेरात

Nagar News : धनगर समाजाला आरक्षण मिळावे यासाठी आज (शुक्रवार) नगर- कल्याण महामार्गावर धनगर समाजाच्यावतीने रास्ता रोको आंदोलन करण्यात आले. परिणामी नगर कल्याण महामार्गावरील वाहतूक ठप्प झाली होती. (Maharashtra News)

जामखेड तालुक्यातील चौंडी येथे गेल्या 17 दिवसांपासून धनगर समाजाच्या आरक्षणाच्या अंमलबजावणीसाठी उपोषणास बसलेल्या आंदोलकांना सक्रिय पाठिंबा देण्यासाठी पारनेर तालुक्यातील सखल धनगर समाजाच्या वतीने हे आंदाेलन छेडण्यात आले.

आंदाेलकांनी मेंढपाळांसह सुमारे एक तास नगर कल्याण महामार्गावरील ढोकी येथे रास्ता रोको आंदोलन केले. यावेळी आंदाेलकांनी सरकारचा निषेध केला. सरकारने येत्या चार ते पाच दिवसात आरक्षणाविषयी जर तोडगा काढला नाही तर यापेक्षाही उग्र आंदोलन करण्याचा इशारा आंदोलनकर्त्यांनी दिला.

या रास्ता रोकोमुळे नगर कल्याण महामार्गावरील वाहतूक ठप्प झाली होती. यावेळी पारनेर पोलीस स्टेशनचे पोलीस निरीक्षक संभाजी गायकवाड यांना आंदाेलकांनी निवेदन दिले.

Edited By : Siddharth Latkar