Nana Patole| 'बाहेरच्या राज्यातील लोकांचं...' ; नाना पटोलेंचे अमित शाह यांच्यावर टीकास्त्र

Nana Patole News : भाजप नेते, केंद्रीय गृहमंत्री अमित शाह मुंबईच्या दौऱ्यावर आहेत. त्यांनी मुंबईत कुटुंबासह गणेशोत्सवानिमित्त लालबागच्या राजाचं दर्शन घेतलं. त्यानंतर एका बैठकीत कार्यकर्त्यांना संबोधित करताना अमित शाह यांनी शिवसेना आणि विरोधकांवर जोरदार हल्लाबोल केला. अमित शाह यांच्या टीकेला काँग्रेस प्रदेशाध्यक्ष नाना पटोले (Nana Patole) यांनी जोरदार प्रत्युत्तर दिलं आहे. 'बाहेरच्या राज्यातील लोकांचं महाराष्ट्रात चालत नाही, अशा शब्दात काँग्रेस प्रदेशाध्यक्ष नाना पटोले यांनी अमित शाह यांच्यावर निशाणा साधला आहे.

केंद्रीय गृहमंत्री अमित शाह यांनी सागर बंगल्यावरील बैठकीत विरोधकांवर जोरदार निशाणा साधला. 'उद्धव ठाकरे यांनी आपल्याला धोका दिला. २०१४ साली २ जागांसाठी शिवसेनेनं युती तोडली. एकनाथ शिंदे हीच खरी शिवसेना आहे आणि ती आपल्या सोबत आहे, असंही अमित शाह म्हणाले. सागर बंगल्यावरील बैठकीत त्यांनी टीका केली.

अमित शाह यांनी माजी मुख्यमंत्र्यांवर टीका केल्यानंतर याबाबत काँग्रेस प्रदेशाध्यक्ष नाना पटोले यांना पत्रकारांनी प्रश्न विचारला. त्यावेळी नाना पटोले म्हणाले, 'प्रत्येक पक्षाला टार्गेट दिलं जातं. प्रत्येकाना आपापल्या पातळीवर प्रयत्न करतात. मात्र, याचा फटका आम्हाला बसणार नाही. यापूर्वी काँग्रेसचा स्वबळावर महापौर बसत होता. अमित शाह यांनी काय बोलावं ? हा त्यांचा प्रश्न आहे. स्वत: अमित शाह यांनी देशाच्या पाठीत खंजीर खुपसला आहे. शाह यांना कानशिलात लगावण्याची भाषा शोभत नाही. बाहेरच्या राज्यातील लोकांचं महाराष्ट्रात चालत नाही'.

'कोरोना काळात राहुल गांधी व सोनिया गांधी वेळोवेळी कोरोनाबाबत आवाहन करत असताना भाजपचे लोक थाळ्या वाजवत आणि दिवे लावत होते. नमस्ते ट्रम्प हे कोण करत होतं ? भाजप नेते महागाईवर बोलत नाही, अशा शब्दात नाना पटोले यांनी भाजपवर जोरदार टीका केली.