सिडकोच्या घरांबाबत मोठी बातमी! जम्बो लॉटरी पुन्हा पुढे ढकलली, नागरिकांचा हिरमोड

नवी मुंबईसह परिसरातील परवडणाऱ्या घरांचे स्वप्न पाहणाऱ्या हजारो नागरिकांचे हिरमोड करणारी बातमी समोर येत आहे. सिडकोच्या घरांच्या जम्बो लॉटरीची घोषणा पुन्हा एकदा लांबणीवर पडली आहे. प्रत्येक वर्षी १५ ऑगस्ट स्वातंत्र्यदिनानिमित्ताने सिडकोकडून जम्बो लॉटरी काढली जाते. मात्र, यंदा अद्याप तरी लॉटरीची घोषणा करण्यात आलेली नाही. त्यामुळे नागरिकांचा हिरमोड झाला आहे.

प्रत्येक वर्षी १५ ऑगस्ट रोजी स्वातंत्र्यादिनानिमित्त सिडकोकडून जम्बो लॉटरी काढली जाते. मात्र, यंदा लॉटरीची घोषणा करण्यात आलेली नाही. घरांच्या किमतींबाबत अजून निर्णय न झाल्याने सोडत प्रक्रियेतील धारक अडचणीत सापडले आहेत.

यापूर्वी सिडकोकडून २६ हजार घरांची लॉटरी काढण्यात आली होती. मात्र, घरे महाग असल्याने अनेकांनी ती सिडकोकडे परत केली होती. यंदा २२ हजार घरांची लॉटरी काढण्याची योजना होती. मात्र, किमती कमी करण्याबाबत कोणतीही हालचाल होत नसल्यानं नागरिकांमध्ये नाराजी आहे.

एकीकडे सिडको घरांच्या किमती कमी करताना दिसून येत नाही आहे. दुसरीकडे सिडको लॉटरी काढत नाहीये. घरांच्या किमतींमध्ये घट न झाल्यास, पुन्हा एकदा मोठ्या संख्येने सोडत धारक सिडकोकडे आपली घरे परत करण्याची शक्यता व्यक्त होत आहे.

मुंबईत ५ हजार घरांसाठी लॉटरी

मुंबईत दिवाळीपूर्वी म्हाडाकडून ५ हजार घरांसाठी सोडत काढली जाण्याची शक्यता आहे. पुढील वर्षभरात म्हाडाने मुंबईसह राज्यात १९,४९७ घरे बांधण्याची उद्दिष्ट ठेवले असून, मुंबईत ५,१९९ घरे बांधली जाणार आहेत. त्यामुळे दिवाळीपूर्वी म्हाडाकडून ५ हजार घरांची सोडत निघणार असल्याची माहिती आहे. यामुळे सर्वसामान्यांना नक्कीच दिलासा मिळेल.