मोबाइल ओढला, धक्का दिला; लोकलच्या महिला डब्यात तुफान राडा, व्हिडिओ सोशल मीडियावर व्हायरल

संघर्ष गांगुर्डे, साम टीव्ही

मुंबई लोकलमध्ये दिवसेंदिवस गर्दी वाढू लागली आहे. लोकल डब्यात व्यवस्थित उभे राहण्यासाठी जागा नसते. याच लोकल डब्यात किरकोळ गोष्टींवरून दोन प्रवाशांमध्ये वाद होतो. अनेकदा किरकोळ वाद हाणामारीपर्यंत पोहोचतात. लोकलच्या महिला डब्यातही हाणामारीच्या घटना घडू लागल्या आहेत. अशीच एक लोकलच्या महिला डब्यात हाणामारीची घटना समोर आला आहे.

ठाण्याहून आसनगावच्या दिशेने जाणाऱ्या लोकल ट्रेनमध्ये महिलांमध्ये जोरदार वाद होऊन त्याचे रूपांतर मारहाणीमध्ये झाल्याची धक्कादायक घटना समोर आलीये. ठाणे ते डोंबिवली रेल्वे स्थानकादरम्यान संध्याकाळी सुमारे सात वाजताच्या सुमारास हा प्रकार घडल्याची माहिती हाती आहे.

गर्दीच्या वेळी एका महिलेला बाजूला सरक असे सांगितल्यावरून दुसरी महिला संतापली. किरकोळ कारणावरून सुरू झालेला वाद काही क्षणांतच चिघळला. त्यानंतर संतप्त महिलेने समोरच्या महिलेला बेदम मारहाण केली. या संपूर्ण घटनेचा व्हिडिओ इतर प्रवाशांनी मोबाईलमध्ये कैद केला आहे. तो सध्या सोशल मीडियावर मोठ्या प्रमाणात व्हायरल होत आहे. व्हिडिओमध्ये महिलांमधील जोरदार झटापट दिसत आहे.

या प्रकरणी संबंधित महिलेविरोधात रेल्वे पोलीस ठाण्यात तक्रार दाखल करण्यात आली आहे. या व्हिडिओवरून पोलिसांनी पुढील तपास सुरू केला आहे. लोकलमधील हाणामारीचं प्रकरण पोलिसांत पोहोचल्यानंतर खळबळ उडाली आहे. पोलीस आता काय कारवाई करतात, हे पाहावे लागेल. परंतु गर्दीच्या लोकलमध्ये अशा वाढत्या घटनांमुळे प्रवाशांच्या सुरक्षिततेचा प्रश्न पुन्हा ऐरणीवर आला आहे.