गुन्ह्यांची कागदपत्रे सुपूर्द न केल्याप्रकरणी पोलीस अधिकाऱ्या विरोधात गुन्हा दाखल

मुंबई - गुन्ह्यांची कागदपत्रे सुपूर्द न केल्याप्रकरणी पोलीस (Police) अधिकाऱ्या विरोधात गुन्हा दाखल करण्यात आला आहे. २०२० मध्ये अधिकारी अनिल सोनावने विरोधात गुन्हा दाखल करण्यात आला होता. त्यानंतर सोनावणे यांची नियंत्रण कक्षात बदली करण्यात आली होती.

गुन्ह्यात सहभाग आढळल्यामुळे त्यांना सेवेतून निलंबित करण्यात आले होते. त्यांच्याकडील गुन्ह्यांची कागदपत्रे पोलीस ठाण्यात जमा करण्यास सांगण्यात आले होते. पण त्यांनी ती जमा केली नाहीत. याच गुन्ह्यांची कागदपत्रे पोलीस ठाण्यात सुपूर्द न केल्यामुळे निलंबित पोलीस उपनिरीक्षक अनिल सोनावणे यांच्या विरोधात कस्तुरबा मार्ग पोलीस ठाण्यात गुन्हा दाखल करण्यात आला आहे.

हे देखील पहा -

प्राथमिक तपासात सोनावणे यांच्याकडे तीन अपघात, एक चोरी, एक बाल कामगार प्रतिबंधक असे पाच गुन्हे होते. एक अपमृत्यूचे प्रकरणही सोनावणे यांच्याकडे होते. या प्रकरणाची कागदपत्रे जमा करण्याबाबत सोनावणे यांना वारंवार स्मरणपत्र पाठवण्यात आले होते. पण त्यानंतरही त्यांनी ही कागदपत्रे सुपूर्द केली नाहीत.

तसेच मालवणी गुन्ह्यांच्या प्रकरणात शोध घेतला असता ती सापडली नाहीत. त्यामुळे पोलीस निरीक्षक नितीन तडाखे यांच्या तक्रारीवरून सोनावणे यांच्या विरोधात बुधवारी भादवि कलम १६६, १७५,२१७, २१८ महाराष्ट्र सार्वजनिक नोंद कायदा २००५ भादवि कलम ९ सह महाराष्ट्र पोलीस अधिनियम १४५ (२) अंतर्गत गुन्हा दाखल करण्यात आला आहे.