Shocking CCTV : लोकल समोरून येत होती, तितक्यात BMC कर्मचाऱ्याचा तोल गेला अन् रूळावर कोसळला, त्यानंतर...

अजय दुधाणे, अंबरनाथ प्रतिनिधी

CCTV footage of disabled man falling on train tracks : रेल्वे स्थानकाचा अंदाज न आल्याने पाय घसरून एक दिव्यांग व्यक्ती रेल्वे रुळावर पडून जखमी झाल्याची घटना अंबरनाथ रेल्वे स्थानकावर घडली. या धक्कादायक घटनेचं सीसीटीव्ही फुटेज समोर आले आहे. दरम्यान या दिव्यांगाचे प्राण MSF जवानाच्या सतर्कतेमुळे वाचले. MSF जवान अमोल देवरे यांच्या धाडसाचे आणि कर्तव्यदक्षतेचे सर्वत्र कौतुक होत आहे. अमोल याने दिव्यांग व्यक्तीला धाडसाने वाचवले. याचा व्हिडिओ समोर आला आहे.

अंबरनाथ रेल्वे स्थानकावर BMC कर्मचारी असलेले सिद्धनाथ माने हे 2 जून रोजी संध्याकाळी सातच्या सुमारास अंबरनाथवरून कर्जत दिशेने जाणाऱ्या ट्रेनची वाट पाहत होते. याच वेळी स्थानकावर लोकल आल्याची घोषणा झाली असता ते लोकल पकडण्यासाठी पुढे सरसावले, मात्र याचवेळी माने यांना स्थानकाचा अंदाज आला नाही. त्यांचा पाय घसरून ते थेट रेल्वे रुळावर कोसळले, या घटनेत माने गंभीर जखमी झाले.

दरम्यान रेल्वे स्थानकावर कर्तव्यावर असलेले एमएसएफ जवान अमोल देवरे यांना घटनेचे गांभीर्य ओळखून सर्वात पहिले लोकल थांबवत आपल्या जीवाची पर्वा न करता स्थानकावरून ट्रॅकवर उडी मारून दिव्यांगाचे प्राण वाचवले आहे. यावेळी काही प्रवासी देखील त्यांच्या मदतीला धावले असून माने याना तत्काळ रुग्णालयात उपचारासाठी दाखल करण्यात आले आहे. अपघाताची ही सर्व चित्तथरारक घटना सीसीटीव्हीत कैद झाली असून अमोल देवरे यांचे सर्वत्र कौतुक होत आहे.